![](https://i0.wp.com/backup.parentlicenses.hk/wp-content/uploads/2023/12/2384.png?resize=740%2C740&ssl=1)
#ParentLicenses2384
爸爸媽咪好早就離咗婚,印象中喺升小一前已經同媽咪同住,而每星期中有兩三日,爸爸會抽時間上嚟探我
我記得喺小五嗰年,爸爸過年前送咗盤細細盤嘅富貴竹俾我,我好俾心機種,又會上網研究泥種水種,學下點樣轉盤,又會儲少少零用錢買種植用品。棵竹真係生得好靚,爸爸每次上嚟都讚我種得好好
媽咪一直都好憎爸爸,成日都同我講話會趁我返學時就扔咗盤竹,又話我亂揈錢去搞無謂嘢,又話盤竹好阻埞。其實唔阻埞,真係細細棵得嗰三四枝,一直養喺我間房嘅窗台
後來,我先知佢係真心討厭爸爸對我做嘅一切。例如爸爸送生日蛋糕俾我,媽咪會叫我留返今晚食,然後趁爸爸走咗就車件蛋糕落垃圾桶。以前我太細個,唔敢同爸爸講,媽咪重叫我:「你老豆問起好唔好食,你就答好食。你試下同佢講我扔咗落垃圾桶,你之後死緊!」
我一直當佢講笑,日日話趁我返學扔,但返到屋企盤竹往往都健在。直至到我升中第一日返學,放學返到屋企,我見到盤竹被分屍放咗喺地下墊喺報紙上面
我媽話:「我講咗好多次叫你扔咗盤富貴竹,你係唔聽嘅,我就唯有咁做,以後你老豆送咩我就扔咩,唔准再收佢啲禮物!」
爸爸知道咗,第一時間係剷我媽咪,話會送過盤俾我。我話唔使,再送只會再扔,再種都唔係當初嗰盤竹
我好傷心,又唔明白,唔鐘意爸爸還唔鐘意爸爸,即使兩個大人分開,點解要咁樣搞著小朋友,點解要咁樣破壞人家嘅心機?
讀者投稿@Y小姐