#ParentLicenses2323

我奶奶係一個超虛偽、貪慕虛榮、成日羨慕人哋有錢嗰啲人

佢自己個女嫁咗三次，次次都係佢不停話個女婿搵得錢少，要佢個女結咗婚生咗仔都重要繼續返工，又成日話自己個女咁靚都唔搵個有錢啲嘅去嫁

佢個女都係嗰啲成日要同人比較嗰類人。例如佢個表妹喺英國結婚，佢就要去歐洲行禮；前男友喺某五星級酒店擺酒，佢就要揀半島擺，就算借錢都要搞大，佢老母重稱讚個女咁樣做先好睇

而因為我老公唔太鍾意個老母，我未結婚前好少見佢哋

我結婚嗰時，奶奶對我哋揀酒席指手劃腳，佢想我加錢做一人一燉湯同唔知要咩嘢食。我哋因為全部係用自己錢搞，所以對奶奶嘅要求我一路say no，但佢就日日打來煩我同我老公，話我揀第二便宜嘅餐唔好睇，失禮人，不停要我揀最貴再加錢嗰啲

我最後出絕招，佢先收聲唔再煩我。當時我同佢講：「錢我哋就係得咁多，你想點搞就你出多咗出來嗰啲錢啦」

佢又成日喺我面前話我老公前女友幾好，人哋爸爸自己開公司，又話我唔係讀名校畢業，佢個仔由細到大都係名校咁

到我而家生咗個女，佢早幾日同我哋飲完茶之後，抱住我六個月大女喺名店面前不停話：「嫲嫲帶你睇多啲好嘢，提高你taste，第日嫁個有錢人就可以日日shopping買名牌」

我嗰刻好嬲，即刻鬧我奶奶：「我生個女出來唔係去賣的，佢想買名牌就憑自己本事搵錢買，點解要靠男人？」

真係好嬲好嬲，你已經教到你個女嫁幾次，唔該唔好再搞我個女好嗎？

讀者投稿@想發火好耐