忍一時 退一步

#ParentLicenses2847

當年被攞走嘅10至12張幪面超人卡,原來可能價值過萬元!但最令我失望嘅,始終係對方媽媽嘅教仔同處事方式

2022年2月,我曾經向貴專頁投稿,講述我太太一位相識多年嘅前同事,帶個仔嚟我屋企拜年時發生嘅事(編按:ParentLicenses1667)

佢哋以前感情非常好,好到以姊妹相稱,甚至會一齊去旅行

上集已經講過個小朋友當日嘅行為,以及佢媽媽嘅管教方式,今次唔再重複

其實當年件事仲有下半集,而且我哋事後翻查閉路電視,先發現原來事情比想像中更加離譜

一、由不停抽卡,到閉路電視揭發真相

當日對方個仔睇我個仔嘅幪面超人卡簿時,已經不停大叫:「呢張我好想要呀!嗰張我又想要呀!」佢一邊睇,一邊不停將啲卡從卡簿抽出嚟

最令我覺得唔妥嘅係,佢唔係睇完就將啲卡插返入卡簿,而係每抽出一張,就擺喺自己大髀旁邊,越擺就越多

我見佢不停咁做,先至出聲叫佢唔好再將啲卡抽出嚟,睇完就應該放返好

當時我只係覺得,去人哋屋企玩,唔應該未經同意就不停將人哋嘅收藏卡抽出嚟,更加唔應該擺埋一邊

對方一家離開後,我哋整理玩具,發現我個仔嘅幪面超人卡少咗大約10至12張。因為早兩日我個仔嘅舅父先買咗一包卡俾佢,當時我已經發現卡簿差唔多放滿,仲同個仔講過唔好再買住。所以突然少咗咁多張卡,我哋自然覺得奇怪,於是我同太太翻查屋企嘅閉路電視

點知唔睇由自可,一睇真係大開眼界!原來對方個仔當時不停抽出嚟嘅卡,並冇放返入卡簿,而且更睇到佢一早已經將部分閃卡抽起,放咗入一個黑色 IKEA 置物盒入面。嗰個置物盒本身係我個仔用嚟擺放其他卡牌嘅,當日亦有攞出嚟睇

最令人震驚嘅係,佢臨走之前,趁住一班大人忙緊準備出門口、冇留意佢嘅時候,靜雞雞由置物盒攞返之前放低嘅卡,放入自己褲袋,然後跟住屋企人離開

即係話,佢唔係臨走嗰陣無意中攞錯,而係由一開始睇卡簿時,已經不停將自己想要嘅卡抽出嚟,擺喺自己大髀旁邊,其後又將部分卡放入置物盒,最後趁大人冇留意時攞走

我當時只係叫佢唔好再抽卡,結果俾佢連續三次指住叫我「收聲」。係一個小朋友去人哋屋企,未經同意不停攞人哋嘅收藏品,當大人出聲制止,竟然反過來叫人收聲!

我想問,你哋作為人父母見到自己個仔有咁嘅行為,係咪真係只需要輕輕講句「要有禮貌」就算?

二、原來被攞走嘅,全部都係較珍稀嘅正版幪面超人卡!

當年我哋只係喺奇趣天地買正版幪面超人卡俾個仔玩,純粹當係小朋友嘅玩具同收藏品,根本唔知道原來部分卡牌喺二手市場可以值咁多錢

直到發現啲卡被攞走之後,我同其中一位同事講起件事,而佢本身都有玩幪面超人卡,對唔同卡款同稀有程度比較熟悉。佢打開日本二手卡牌網站,幫我對照卡款,仲俾我睇埋相關卡牌嘅市場標價,我先至發現原來部分同款卡牌喺日本二手市場嘅參考標價,折合港幣竟然大約每張800至1,500元!

但最令我覺得奇怪嘅,唔單止係啲卡原來有一定收藏價值,而係對方個仔當日並冇攞走普通白卡,佢抽起嘅全部都係閃卡同數量比較珍稀嘅卡款

我哋做父母嘅,當年都唔識分邊啲卡值錢,只係買正版卡畀個仔玩。但一個小朋友,竟然喺咁多張卡入面,攞走嘅全部都係較珍稀嘅閃卡,普通白卡就一張都冇攞。究竟佢本身識得分辨卡牌嘅稀有程度,定係純粹鍾意啲閃卡,所以先揀咗佢哋?呢點我唔敢肯定

如果按照當時查到嘅每張參考價格粗略計算,10至12張卡嘅價值可能涉及港幣8,000至18,000元。不過,實際價值仍然要視乎每張卡嘅版本、保存狀況同成交價格

當年我哋以為只係少咗幾張小朋友玩嘅卡,事後先知道,原來可能涉及價值過萬元嘅收藏品。不過對我嚟講,最重要嘅始終唔係啲卡值幾多錢,而係就算只係一張唔值錢嘅普通白卡,唔係屬於自己嘅嘢,就唔應該擅自攞走

三、我哋選擇息事寧人,點知事情仲有後續

當時我哋原本打算同佢媽媽講清楚,但我太太念在多年姊妹情,覺得為咗幾張卡傷感情唔值得,最後決定算數,以後減少來往就算

我哋以為件事就此告一段落,點知四年八個月過去,事情竟然仲有後續

呢幾年,我哋慢慢發現,我太太同幾位相識多年嘅朋友逐漸疏遠,聯絡越嚟越少,到最後甚至完全冇再往來。呢幾位朋友原本都係我太太同對方媽媽共事多年嘅舊同事,大家由同事變成朋友,一直都有交情

不過,自從我個仔出世之後,我太太因為要照顧小朋友,少咗出席聚會同旅行。相反,對方媽媽就經常同佢哋約出嚟玩,甚至一齊去旅行,久而久之,彼此自然變得更加熟絡,關係亦比我太太親近。另外,連我自己部分原有嘅客戶關係,亦逐漸受到影響,之後冇再合作

惟令我哋覺得奇怪嘅,係當中曾經有共同朋友旁敲側擊,問過我哋一啲關於當年事件嘅問題。當時我哋冇諗太多,亦唔想再提起件事,所以冇詳細解釋。但後來回想返,先發現對方當時問嘅問題同講嘢方式,其實有啲奇怪

我哋懷疑佢可能之前已經聽過另一個版本嘅故事,以為當年係我哋做得唔啱,但又唔好意思直接問清楚,所以先用旁敲側擊嘅方式了解。當然,呢個只係我哋事後嘅推測,唔能夠肯定佢究竟聽過啲乜

但正正因為咁,我哋先開始反思,當年明明係我哋選擇唔追究,點解最後反而同一班朋友慢慢疏遠?

四、朋友遇到類似事件,令當年嘅事再次被提起

其實當年發生呢件事之後,我都有同幾位相熟嘅兄弟同同事傾訴過,佢哋一直都知道成件事嘅來龍去脈

直到早幾個月,當中有朋友遇到類似嘅情況,令佢諗返起我當年嘅經歷,於是問我件事最後點樣處理

我就話:「冇呀,當年我哋決定算數,之後一直冇再同對方來往。咁多年過去,佢媽媽都冇主動搵過我哋,件事就咁不了了之」

點知朋友聽完之後,反而提出咗一個我一直冇深入諗過嘅問題:「個仔當日攞走咗10至12張卡,返到屋企突然多咗咁多張,做媽媽嘅真係完全冇發現?就算發現咗,點解咁多年都冇搵過你哋?」

朋友呢番說話,令我重新思考當年件事,尤其係對方媽媽作為家長,究竟有冇留意自己個仔嘅行為,以及面對問題時應有嘅責任

當然,我冇證據證明佢媽媽當年知道個仔攞走咗啲卡,所以唔會話佢一定知情。但如果一個小朋友返到屋企,突然多咗一批唔屬於自己嘅物品,作為父母,係咪應該了解清楚啲嘢從何而來?如果發現個仔攞咗人哋嘅嘢,係咪應該教佢歸還、道歉,同埋承擔責任?而唔係因為個仔被人責備,就只係覺得自己個仔受咗委屈

最令我失望嘅係,由事發到今日已經經過四年八個月,對方一家從來冇主動聯絡過我哋了解件事,亦冇任何交代或者道歉

五、我真正介意嘅,係呢位媽媽嘅教育同處事方式

小朋友做錯事,其實唔可怕。因為小朋友仲細,對是非、界線同責任嘅理解,都需要父母慢慢教導。但如果父母面對自己個仔嘅問題,只係輕輕帶過,甚至當有人出聲制止,就認為人哋針對自己個仔,咁究竟係愛個仔,定係害緊個仔?

真正嘅家教,唔係淨係教小朋友見到人識叫叔叔、姨姨,而係教佢尊重別人、唔可以隨便攞人哋嘅嘢,做錯事要認,要識得道歉。父母更加應該以身作則,遇到問題,應該先了解事實,而唔係單方面認定自己個仔冇錯。如果成年人自己都唔願意面對問題,又點樣要求下一代學識承擔?

我哋當年選擇唔追究,係因為珍惜多年朋友關係。但我哋嘅忍讓,唔代表當日冇發生過任何事,更加唔代表我哋應該承受事後所有負面說法

六、閉路電視片段一直保留,而對方媽媽嘅家人其實我都認識

當日嘅閉路電視片段,我一直都有保留。另外,對方媽媽有幾位家人其實我都認識,但我太太並唔認識佢哋。不過,事發之後,我哋一直冇主動搵過佢哋講呢件事

我從來冇打算周圍公開片段,亦唔想因為一個小朋友做錯事,就將佢一生定性。但如果有相關人士真係想了解當年發生過乜嘢,我願意私下提供片段,俾佢哋了解事情完整經過

講到尾,我最介意嘅已經唔係嗰10至12張閃卡,而係父母面對小朋友犯錯時,究竟有冇盡到教育責任。一個小朋友做錯事,可以改,可以教。但如果做父母嘅連問題都唔肯正視,將來個仔再犯更大嘅錯,又有邊個幫佢承擔?

生仔唔一定要考牌,但教仔真係要有責任心

最後想問大家一句:如果你個仔喺人哋屋企,事先將人哋嘅嘢收埋,臨走再偷偷攞走,仲要當住你面前指住長輩叫「收聲」,你會認真教佢承認錯誤、尊重別人,定係反過來怪責嗰個出聲制止佢嘅人?

讀者投稿@無奈的家長

error: