#ParentLicenses1809

最近俾爸爸睇呢個Page，佢叫我幫佢分享下一個早排剛發生嘅經歷

爸爸喺某私人屋苑做夜更保安，有晚9點幾控制室叫佢上某座某樓某室。原由係有住戶話隔離屋插咗抽鎖匙喺鐵閘，撳鐘唔響，拍門又冇人應，所以搵管理處處理

爸爸一上到去，就見到打落控制室個女仔，佢企咗喺自己屋企門口，估計應該佢都拍咗好耐門，成頭汗（走廊好熱）

個女仔一見到我爸爸就同佢講抽鎖匙篤喺鐵閘，鄰居應該係返屋企，但拍門冇人應就驚有咩事。於是，就輪到爸爸不停拍門

因為個女仔屋企啲冷氣吹唔到出嚟，爸爸熱到大汗疊細汗，女戶主（應該係女仔個媽媽）見爸爸成頭汗，即刻拉把電風扇喺門口吹啲冷氣出嚟，又遞紙巾

此時已過咗近十分鐘，爸爸就影抽鎖匙張相，再Whatsapp去上級請示點做。上級叫佢拎返去控制室保管，之後再聯絡相關屋主

正當爸爸準備走之際，男屋主終於開門，但皺晒眉，黑口黑面問：「咩事？」

爸爸：「你鄰居見到你漏咗鎖匙喺門口，所以call保安上嚟幫手處理」

我爸爸一路講時，個男人一路擺隻食指喺嘴邊係咁「殊」佢（但爸爸話因為喺走廊，自己已經好輕聲講），爸爸跟住喺鐵閘啲細格遞返抽鎖匙俾佢。個男人一聲唔該都冇，搶返抽鎖匙，勁大力「嘭」就閂咗木門，留低爸爸同個女仔呆咗企喺度

女戶主可能想緩和下氣氛，同爸爸講：「隔離屋有兩個小朋友，可能驚嘈住佢哋」

爸爸同佢講：「唔緊要，解決咗就得」

個女仔同媽媽不停同爸爸講：「唔該晒，麻煩晒」連一直喺屋入面冇露面嘅男户戶主都嗌出嚟話唔該，跟住爸爸就返咗落樓

爸爸嘅評價係，兩家人住隔離，差別可以咁大？個男人冇禮貌到不得了，唔知佢阿媽點教，亦唔知佢會點教仔女。人哋講緊嘢，你就喺度「殊」人；為咗抽鎖匙同佢搞咁耐，一聲唔該都冇。爸爸自己返工遇到呢啲情況就可以當人工包咗，但隔離屋係其實冇義務幫佢，就算真係怕嘈親佢仔女，咁大力閂木門又唔嘈咩？

同隔離屋相比下完全係兩個世界，個女仔好有禮貌，同佢講唔該時係不停彎腰嗰種，個女戶主見佢熱又整風扇又俾紙巾，連男戶主全程冇參與都講句唔該

一家兩代都有牌，一家就兩代都冇牌🤷🏻‍♀️

讀者投稿@保安爸爸個女