#ParentLicenses1813

心情好鬱，好想寫出嚟發洩下，我知我做唔到啲咩，但係我會祝我舅父舅母長命百歲，百病纏身

唔好話我黑心先。件事起源於我老母嗰邊，即係我婆婆一家。我婆婆生咗9個後代，一個仔，其他8個都係女，我老母係其中一個女。點解阿婆生咁多？我點知啫，我有記憶開始就已經係咁多，基本上全部阿姨、姨媽除咗某幾個，都無乜點讀書。因為水上人，無錢讀，資源基本上留晒俾嗰個仔，即係我舅父

由細到大，我都唔知點解個個阿姨、姨媽都買唔到樓，得我舅父可以買到樓。佢哋住喺馬鞍山某個好耐歷史嘅居屋，公公婆婆同舅父舅母連埋佢哋仔女一齊住。後尾公公過世，我當時好細個，都聽到啲耳語——原來公公婆婆將班女俾佢哋嘅孝親錢，拎去資助舅父兩公婆買樓喎。唔怪之得，明明佢哋都係做工廠，竟可拎到筆錢出嚟買啦。不過呢啲無得恨嘅，鬼叫你無父幹？

咁多年嚟，班女，即係我阿姨、姨媽加埋我老母，大家都心裡有數，唔爭唔搶，只要舅父照顧好婆婆就乜都OK，間唔時我哋買去孝敬老人家嘅嘢要過河濕腳都OK，不過你信唔信一個長者同仔加媳婦同住，都要靠長者中心送飯先有飯食？原因係佢個仔同新抱只會煮自己，唔會煮俾老人家食；老人家如果要外出活動就係自己落街，到年紀大咗自己落唔到，就係班子孫輩嚟探佢嗰時帶佢落街

最近肺炎爆到冚，院舍人人自危，我舅父就話要送婆婆入老人院……我哋幾個細嘅，反應一致都係「What the fuck？」

因為我婆婆年紀唔細，但係難得地神智清醒，只係行動唔算好方便要靠拐杖。佢住咗咁多年嘅嗰個屋企，佢只會行出客廳又行返入房，坐喺佢張碌架床度，聽下收音機。其實都住咁多年啦，究竟有咩需要而要喺呢個時候擺佢入老人院？

原因係咩？嗰日上去講數，終於知啦，原來就係一句：「我要推佢出街，唔要佢死喺我屋企！」

嗰日我聽完呢句，再聽埋我嗰個舅父振振有詞話咩「人生一定要行到呢步」「舅父舅母自己隻腳都唔方便」，我第一下反應係問「咁點解你自己唔一齊入老人院？你都照顧唔到自己啦？」「又點解唔請工人一次過照顧晒你哋三個？」

然而我舅父係咁話：「你哋鍾意嘅就帶佢（我婆婆）走，我隨時歡迎，無人帶佢走就入老人院」「間樓我老婆帶錢嫁俾我買嘅，我媽一毫子都無出過！」

我婆婆本來仲識得同我舅父講話：「當年同公公俾咗幾萬蚊，果啲唔係錢咩？」到最後喊住講：「入老人院就人老人院啦……又可以點？」

其實真係無乜可以點嘅，咁多個女，總要有人出嚟攬佢，咁咪有人硬住頭皮出嚟攬囉，唔係可以點啫？個個外嫁女自己都有屋企，香港啲樓又唔係幾千呎，指望你做仔嘅養你老母到死，頤養天年，但係仆街到你咁樣，我哋無嘢好講

舅父仲可以對住當日唔在場嘅姨媽們話我哋班細嘅拖佢祖宗十八代出嚟鬧，但明明就係佢扭曲嚟講，連上咗天堂唔知幾多十年嘅二姨媽都俾佢拖埋出嚟講喎？

舅父講得出話「人一生一定行到呢一步」「點解佢（我婆婆）唔早啲死」，唔好話我黑心，記住第時你哋要被送入老人院嗰時，千祈唔好反抗。我相信，終有一日，你去到嗰一步嘅時候，你都會遇返同樣嘅嘢，放心啦。不過唔知我睇唔睇到啦，起碼等婆婆百年之後，我相信我都唔會再同你哋有關囉

爭啲唔記得咗講，舅父為咗送婆婆入老人院，早有預謀搵人上門幫一個疫情期間足不出戶、百歲嘅老嘢打4兄，見佢打完兩針無好似羅蘭姐個廣告咁，四人打牌、一同歸西，就直接送入老人院。除咗講呢個仆街真係想婆婆早啲死之外，其實我都唔知講咩好

養兒防老？哈哈，真係bullshit嚟！

讀者投稿@拍薑