#ParentLicenses0849

我有三兄弟姊妹，我排第二，有一個哥，一個細佬，我爸爸做地盤，我媽媽係全職家庭主婦

細細個時屋企經濟好差，因為爸爸好爛賭，其實佢揾到錢嘅，但拎曬去賭。我媽好錫我哥同細佬，但好唔鍾意我。我爸好錫我，但佢成日唔返屋企，一係返工，一係就過咗大海🤦🏻‍♀️

我媽20歲鬆啲就生咗我哋三個，本身性格就好燥底，年紀又細根本唔識教，加上生活壓力好大，令佢好鍾意對我哋用體罰。但我細佬因為係最細，受到我媽溺愛，基本上無受過我媽嘅變態體罰

細細個幼稚園就將我哋掉去隔離無人住嘅空屋。全屋黑掹掹，一困就係幾個鐘。另外我媽打起我同哥哥上嚟好金，佢會先用賓辮嘅方式織一條尼龍繩令條繩好實淨，之後會喺個露台窗框到縛住你雙手再離地吊高，再不停用藤條打你。吊起咗又無得避，真係下下硬食，最可怕佢會閒時就叫我哋幫手織定條繩

我哋成日都好提心吊膽，有時成績唔好會一巴車埋嚟，試過成隻牙飛出來🥺，從細就叫我死八婆，「死八婆」就好似係我個名咁

細佬如果一喊我哋就好大件事

試過有次細佬要用玩具掉我哋，但我哋避，佢掉唔中就喊，我媽就會不問因由，打我哋一獲金嘅

成個童年就係咁成長，我哥哥好我少少，因為佢識氹丫媽歡心，仲成日比死貓我食

我從細都唔識講嘢，個人好老實，總之我媽就唔鍾意，我心𥚃好羨慕哥哥細佬，因為佢哋有媽媽嘅愛

但我從小就無怨恨既心，只係覺得好怕佢，對住佢好緊張，親子關係我從不曾有過

媽媽性格好剛烈，爸爸過咗大海，佢會喺屋企好癲。我次次唔敢瞓，半夜Mon住呀媽，擔心佢做傻事🤦🏻‍♀️

佢同老豆嘅婚姻最終因為我老豆太爛賭而分開。分開咗後，我媽咪同哥哥都出咗來做嘢養家，我同細佬仲讀緊書，我間中有做下兼職

有一次我同細佬落街跑步，返到屋企我媽就發癲一巴巴咁車埋嚟，話我太夜返了，其實係8點鐘🙄。呢一次咁多年嘅情緒終於爆發，我離家出走，我打算以後都唔返呢個屋企

足足一個月，我被媽咪搵到，我只有跟佢返屋企。我將咁多年心中嘅感受講佢知，我同佢講：「若你不能愛我，請不要帶我回家，我唔想再成為你的出氣桶🙏🏻」媽媽答應咗我，自從果日佢無再打過我，咁多年嘅體罰終於完

果年我16歲，之後我哋再建立返我哋從0嘅親子關係，我陪佢走過人生一個又一個難關

來到今日，我自己都有家庭同小朋友，但我堅決不用體罰教小朋友，因為我知道一打就返唔到轉頭 ，我明白被人打嘅感受🥺

讀者投稿@Elva