#ParentLicenses2387

今晚喺荃灣Aeon玩擲彩虹，有個女人帶住個女（中學生）喺咁逼埋嚟，又拎個袋嚟撞我同個仔。我都算喇，落嚟玩，都係想開心咋嘛。當隔籬另一家人玩完離開，我見有位，我同個仔就移過啲。佢哋嗰邊唔係冇位㗎喎，但佢仍然繼續越逼越過

當時我一句聲都冇出㗎喇，直到最後我同個仔執埋啲禮物走，個女人突然走埋嚟影我哋相，佢重要潑婦駡街咁鬧我哋（好無辜呀）。佢嘅潑婦駡街驚動到店舖，之後店舖職員就埋嚟處理

隨後，我同店舖講述事件經過，並同店舖職員講只要求佢哋刪除相片。語畢，職員呼叫咗保安主任同經理上嚟。過程中，個女人係keep住潑婦駡街、情緒失控咁㗎，之後又身有屎咁唔敢俾經理睇佢電話，再放話要報警。咁okay嘅，保安主任又真係冇權力要求睇顧客電話，之後Aeon就報咗警

除此之外，個女人重講大話。佢同保安主任及經理講話我爭佢個位，逼埋佢度。咁冇嘅，我咪同保安主任講：「呢度有CCTV，睇CCTV就知事實」

其後保安主任都有睇返CCTV，而且有同警方講返係個女人用身體同埋紙袋撞我哋，見到我哋都越移越遠，佢哋就係咁逼過嚟。警方有問我同個仔有冇受傷，咁我話：「冇嘅，好小事」

其實去玩都係想開心啫，做乜要周圍撞人鬧人呢？有情緒病定真係平時太受壓喇？而家周圍都係CCTV，你做過啲乜，其實一睇就知事實㗎啦，做乜要喺啲小朋友面前講大話呢？身教呀

如果係你哋，你揀出聲互鬧，鬧完可能都係冇結果，抑或揀避開呢啲人？

讀者投稿@NA