#ParentLicenses2386

星期六日商場女廁要排隊好正常，但以下行為真係好無禮貌。唔好同我講小朋友唔識，就係唔識先要教，識晒使咩要你教呀！

我同親人去紅磡站某商場去廁所，一前一後咁排隊等去。我親人入咗廁格後，我等下一個人去完嘅時候，我後面有個目測六七歲嘅女仔走出嚟，佢踎喺啲廁格門底嘅空隙去望

我想講，嗰個商場個門隙至少有25cm，本來以為佢只係𥄫一個廁格，又以為佢只係睇下佢呀媽去完未，點知佢係逐格逐格𥄫

我即刻出聲叫停佢，我話：「唔再𥄫啦，你咁樣好冇禮貌，人哋去緊廁所」

佢話：「關你咩事啫，我鍾意𥄫咪𥄫囉！」

後面有個女人都出聲：「你呀媽喺邊呀？𥄫人去廁所咁冇教養」

個女仔重大大聲話：「去廁所去咁耐，咪𥄫下佢哋喺入面做咩囉！」

跟住有個女人去完出嚟，個細路女直接入咗去，但係原本我係排喺佢前面嘅，不過我廢事佢𥄫我，所以冇出聲

未幾，貌似佢呀媽行入嚟問佢去完未，排我後面個女人就問佢：「你個女係咪粉色衫綠完褲？」佢媽話：「係」

個女人就話：「你教下你女啦，佢頭先踎喺度𥄫人去廁所」

佢媽話回應：「小朋友急尿冇辦法，鬼叫啲人去咁耐咩！」

有對本來冇出聲排後面嘅母女中嘅媽媽都出聲話：「我小朋友都急，但我會教佢等下，一係就早啲出聲話要去，𥄫人去廁所點得㗎？」

最後我就有廁格去廁所，親人洗手時都感嘆而家啲父母太蹤容個小朋友，遲早要還！

讀者投稿@Yyuy