#ParentLicenses2841

今日同屋企人喺荃灣某間茶餐廳食下午茶，我坐個位係一張好長嘅木梳化，張梳化橫跨咗幾枱，而隔離枱坐嘅係位媽咪同3歲左右嘅細路仔

個細路仔一坐低冇耐就郁嚟郁去，幾個侍應都提過佢坐定。之後佢就攞住新買嗰盒玩具喺張櫈度郁嚟郁去同埋不斷踢張櫈，搞到成排不斷喺度震

忍咗成十分鐘後，個位啊媽終於出聲，不過個細路都冇諗住停

無奈之下我哋都出聲，叫個細路唔好再踢同埋收返埋佢盒玩具。個細路先停咗望住啊媽，跟住個啊媽就喺度話：「佢識㗎！我教緊佢，無整到你哋啊」

屋企人：「你係家長就應該第一時間出聲」

語畢之際，個細路就突然間喺度喊，個啊媽氹返佢之後就補多句：「你真係叻啦！3歲就識坐定定，唔知十幾歲嗰啲點呢？」

講真，個細路喺侍應攞住嘢食嘅時候已經郁嚟郁去，啲侍應都提咗幾次，我哋都望咗幾次，前前後後成十分鐘你先出聲，而且個細路仲要唔係即刻停，要喺我哋出聲後佢先停，萬一嗰下你個仔撞到個攞住熱嘢嘅侍應，導致啲嘢倒瀉晒整到佢點算？

你個仔3歲都應該K1啦，出街食飯要坐定呢樣嘢係呢個歲數正常唔係應該已經識㗎咩？定係我屋企教呢樣嘢教得早？我哋忍咗成十分鐘先好聲好氣提一句，啊媽你咁就跳制？今次冇事啫，但難保佢又喺餐廳郁嚟郁去整到人甚至整親自己呢？生咗佢就教好佢啦！

讀者投稿@大學生