#ParentLicenses2840

為人父母，由小朋友出世第一日開始，相信大部分父母都會盡自己能力，想將最好嘅留畀下一代。除咗供書教學，希望佢哋將來有能力、有知識，更希望從小教識佢哋點樣做人——有品德、有責任感、懂得珍惜，亦明白父母為自己付出嘅一切並不是必然

之前喺一個飲食group見到一篇post，睇完其實幾有感觸

每個家庭都有自己嘅生活方式同經濟狀況，外人其實唔應該單憑一篇post就去評價一個家庭，所以我亦唔想針對任何人。只係睇住當中嘅內容，會令人不禁諗：原來每個父母對「盡自己能力俾小朋友最好」嘅理解，可以有好大分別

小朋友長期食啲咩、日常生活點安排、衣著係咪合適，其實未必需要花好多錢，但背後反映嘅可能係父母對小朋友需要嘅重視程度

更加令我有感而發嘅，係連小朋友嘅畢業Trip花費£310都需要考慮應唔應該參加，甚至要出post暗示叫人夾錢

「£310」對每個家庭嘅負擔當然唔一樣，呢一點我完全明白。經濟有困難，絕對唔應該覺得羞恥，亦唔應該因為無能力負擔某啲活動而被人取笑。學校都安排分期付款方式，去減輕家長嘅經濟壓力

但睇返comments，亦有人提到，如果平時買自己嘅化妝品、護膚品等消費可以毫不猶豫，咁當涉及小朋友一次人生階段嘅重要回憶時，會唔會值得重新衡量一下優先次序？

其實父母可以唔富有，屋企可以唔豪華，小朋友亦未必要擁有名牌或者最好嘅物質生活。但我一直覺得，父母俾小朋友最重要嘅，唔一定係「最好」嘅物質，而係讓佢知道：你係被重視嘅，你嘅需要有人放喺心上

做父母，其實真係一世嘅功課

有時睇到其他家庭嘅故事，亦會提醒自己「我哋未必係最完美嘅父母」，但至少希望喺能力範圍內，盡力俾自己嘅小朋友一個有愛、有尊嚴、有回憶嘅童年

純粹有感而發，並非針對任何人。只係覺得呢篇post幾值得大家入去睇一睇，再自己諗一諗

相片來源@ Gigi
讀者投稿@ Gigi