#ParentLicenses2542

朋友自中學開始有情緒病，一直喺公立醫院跟進住佢嘅狀況。漫長嘅治療過程中，發覺好多自小都有嘅問題冇喺當時被診斷，例如ADHD（大學時喺公立醫院經心理學家診斷）

一路以嚟，佢同其他朋友都因為好多相處嘅問題而令朋友們都離開佢，直至而家出嚟社會工作咗一段時間，每份工都係因為與同事關係差而被炒

社工懷疑佢有自閉症，因為症狀有啲吻合，所以建議佢做評估。可是因近年移民潮，好嘅醫生都走晒（包括一直跟開佢嘅精神科醫生），經幾次精神科覆診後，無奈就會轉一個新醫生俾佢。佢多次嘗試同醫生討論佢自閉症嘅可能，醫生大多都敷衍佢，又唔肯轉介俾心理學家做評估

既然公立醫院幫唔到，佢唯有問私家診所做評估，然而索價六千幾蚊對於疫情時失業嘅佢係一個難以負擔嘅數字。所以一年前，佢排耀X協會，等到今年一月，協會終於打電話俾佢

職員：「如果評估喺協會度做，要排隊等到二月，建議你喺公立醫院度做快啲」

朋友：「唔緊要，可以照排」

苦等到二月時協會打俾佢，話排到佢，著佢可以帶埋佢媽媽一齊嚟，協助做評估

講到佢媽媽，其實一直唔肯承認佢有病，所以唔肯去，而唔知係咪因為咁，協會覺得佢玩嘢，所以到最近佢終於說服媽媽肯協助做評估後，協會社工諸多為難，例如突然話要同佢媽媽電話溝通，要家人簽同意書，拎晒佢公立醫院咁多年來嘅醫療紀錄，如果唔係冇得做云云

畢竟佢同協會社工一路都只係經電話WhatsApp溝通，未曾真正見過面。佢問：「點解要拎晒所有醫療紀錄？可唔可以指出對評估有幫助的部份？」

因為朋友唔擅長溝通，我幫佢同社工問要拎醫療紀錄嘅原因，社工起初話係日後治療有需要

我話：「咁可唔可以做完評估先？真係確診自閉症而要做治療先攞醫療紀錄」

社工不斷複述：「我哋協會程序好繁複，會唔會考慮退出？」

直到最後社工話係朋友自己願意俾醫療紀錄佢，佢冇要求過

我問：「如果同佢媽媽電話溝通完再俾埋醫療紀錄，係咪就可以做自閉症嘅評估？」

社工話：「到時再算」

我坦白問社工：「其實係咪唔想同佢做評估？如果係嘅可以直接講」

社工堅持話：「唔係，但就首先要拎晒所有醫療紀錄」

我朋友聽到呢個消息好唔開心同嬲，佢平時係唔識同人溝通，但由細到大心地善良，只係想做個評估，只係想知道要向邊個方向做治療，但遺憾係得到咁嘅對待

因為我知道大部份嘅自閉症喺小朋友時期已被診斷，所以想問吓各位家長，重有邊度可以免費做自閉症的評估？

讀者投稿@Sindy