#ParentLicenses1528

先講少少背景，家中是傳統的客家家庭，重男輕女，但我從來沒有覺得因為細佬佢係男仔而備受寵愛

我媽咪係大陸人，嗰陣因為老豆要返工，我媽落嚟香港生咗我之後，就將我俾咗爺爺嫲嫲照顧

因為爺爺嫲嫲都係重男輕女，不過只係刀子口豆腐心，當知道第一胎係女，都有講咗啲唔好聽嘅說話。唔知係咪因為咁樣，我阿媽就將怨氣發洩落我身上

及後，因為嫲嫲身體有事，我阿媽可以落嚟香港，就開始一家四口的生活

我和細佬成日無故被人打——父母鬧交會將怨氣發洩落我哋身上，用雞毛掃打到我哋成身瘀傷；又試過因為一件好小嘅事，嗰陣報紙可以剪優惠券去百佳換牛肉燒賣，而因為我肚餓，就私自食咗我老豆去排隊換嗰包牛肉燒賣，佢就攞菜刀恐嚇我；曾經病咗感冒菌入腸，無人會理我，無人帶我睇醫生，由我自生自滅，最後就要一個老人家搭一個鐘車嚟陪我睇醫生

後來，因為我發生咗啲事，可以脫離地獄家庭，社工將我交咗俾姑姐養。我有時聽返細佬講，佢都仲係成日被人打，試過做錯少少嘢，就一張椅車埋佢去，即使搞到頭流哂血都冇人理

到我哋出嚟社會做嘢後，我哋就好似搖錢樹咁不停要將人工嘅3分2出來畀家用。我就當然唔會畀，細佬就有，但我過時過節有畀錢，佢叫我買補品俾佢哋都一定買

但其實我想講：「我唔係你養大㗎，唔好打算俾咗兩頓飯我吃，以為就係好偉大，我和細佬都只係你哋出氣袋」

到最近，因為疫情關係，細佬少咗工開，過往佢哋生日都有送好貴嘅禮物，例如金器之類，但老豆生日嗰陣細佬冇錢，細佬冇送禮物，而我就折現咗1500蚊俾老豆

直到呀媽生日嗰陣，咁啱有消費券，細佬送咗金鏈畀呀媽，我送咗玉佛，我老豆發晒脾氣話我細佬大細超：「個心得呀媽冇老豆，剩係送俾呀媽我冇禮物」

老豆發晒脾氣又唔返屋企吃飯，我細佬就俾呀媽日哦夜哦，促細佬補返份禮物俾老豆。我細佬最後頂唔順，遂去咗親戚度住幾日，但仍然日日俾人whatsapp轟炸叫送禮物

有時候我諗緊，其實父母應有嘅愛和照顧我哋等等，我同細佬都從來沒有享有過，點解大個要情感勒索我哋？仲要我哋化身為一棵搖錢樹咁？

圖片來源@喜劇之王
讀者投稿@搖錢樹