#ParentLicenses1529

我大仔8歲，細女5歲，有日放學要去學嘢，見未夠鐘，就喺centre附近嘅公園玩陣

玩咗一陣，有個應該4-5歲嘅小朋友走近我個仔，踢咗佢一腳（都用力嘅，但始終細過我個仔，佢又唔係話好痛）

我就問個小朋友：「做咩踢人？」

佢唔應我，走返去佢呀嫲度

👩🏻：我
👩‍🦳：呀嫲

👩‍🦳：「你個仔呀，尋日攔住我個孫唔俾佢行呀！」
👩🏻：「我哋尋日冇嚟過喎！」
👩‍🦳：「XX（佢個孫個名），係咪佢呀？」

佢個孫點頭

👩‍🦳：「嗱，都話係你囉！」
👩🏻：「我哋尋日冇嚟過，一係報警囉？Check下就知啦」
👩‍🦳： 「唉，唔係咪唔係囉，細路仔認錯人啫！」
👩🏻：「認錯人唔係問題呀，咁你叫佢道歉呀，冇啦啦踢人一腳，就算係認錯人都要道歉啩！」
👩‍🦳：「細路仔認錯人咋嘛，邊有咁大件事呀，都話認錯人囉」
👩🏻：「唔怪之得佢唔道歉啦，大人都唔教，家教好重要㗎！」
👩‍🦳: 「ooxx##」（下省一大堆鬧人嘅說話）

我明白好多家長要返工，要交仔女俾老人家湊，但身教真係好重要。嗰位鄉音呀婆由一開始就聲大夾惡話我個仔「尋日攔住佢個孫」，到話「認錯人」，甚至鬧返我轉頭，一句對唔住、唔好意思都冇，佢個孫每樣都會學晒。學壞三日，學好三年呀，希望佢會學返好啦！

我個仔話：「其實你唔道歉都ok，因為唔係好痛」

我同我個仔講：「道歉，唔係因為佢整痛你，係因為佢做錯咗，如果你做錯，幾大件、幾細件嘅事你都要道歉！」

我諗呢樣嘢，幼稚園間間都有教，但父母都要教！

圖片來源@食神
者投稿@Level 2 媽媽