#ParentLicenses1047

我個女係ADHD及自閉症譜系嘅確診者

首先，我想簡單咁講一下有ADHD同自閉症譜系嘅小朋友會有嘅行為

「ADHD」即係專注力不足/過度活躍症。照字面睇，即係唔專心同坐唔定啦。佢哋好多時會大聲叫喊、發出一啲無意思嘅聲音、講嘢無尾音，好似好無禮貌咁，無論去到邊都會跑來跑去，有啲甚至有攻擊性行為……等等

而「自閉症譜系」患者，喺社交上溝通以至認知、情緒、行為方面都有唔同嘅困難，例如會比較自我、固執、自己想點就點、無理堅持、講嘢唔會望人、情緒容易大起大落、重覆無意義動作、唔識睇人眉頭眼額……等等

大致上係咁，如果有錯或遺留請更正

我個女係輕度嘅患者，但平時照顧佢，我都己經心身疲勞。每日都會重複又重複同一行為，無限LOOP咁，例如：朝早叫極唔起身，放學後叫極都唔做功課，做功課時又無極限遊雲，走咗去做其他嘢，食飯食個幾兩個鐘，叫沖涼叫咗成半個幾鐘都仲未肯去，夜晚叫好耐都唔肯上床瞓覺，就算上咗床，自己一個都可以唱歌講嘢。總之，當佢手上有咩，都係可以攞嚟玩。用溫柔聲線，佢唔會聽，每一次都係要用到最大聲、最惡嘅語氣同聲線，佢先會發住脾氣去做

以上事件每日必經，仲未計其他嘢。試想下，我個女只係輕度，情況比較嚴重嘅小朋友，其父母身心應該比我更甚

我睇咗好多關於教導小朋友嘅書，透過上網睇過好多資料，軟硬兼施，去教我個女，但無論我用咩方法都好，都無幫助

我遇到最多嘅係教我點教小朋友嘅人——「你唔識教啫」、「你縱佢啫」、「教到佢咁曳」、「咪點點點教囉，點會唔得啫」、「點解人哋得，你唔得」等呢啲說話，而呢啲說話有啲係出自自己家人口中

當時我覺得自己好無用，唔識教好自己個女。又唔知係唔係我懷孕時，唔知食咗啲咩，又或者無好好餵母乳，佢先會有呢個病

事實上，當我收到評估結果時，我係接受唔到，但同時又得到一個安慰，因為呢個病係先天，無任可原因，亦唔關管教問題嘅事

佢哋係知道自己呢啲行為係唔啱嘅，但只係佢哋控制唔到自己，並唔係因為佢哋曳，唔係我唔識教，唔係我無用，唔係我累到佢咁……當然我唔可以用呢個病作為藉口，放任佢唔管教啦

我打呢篇嘢，係想大家可以了解一下呢個病。我聽到好多聲音，睇到好多嘅投稿，都會話：「唔識教唔好生」

其實大家有無諗過，我哋比一般父母更勞心勞力，更用心去照顧小朋友？有邊個唔想自己小朋友無病無痛、健健康康、正正常常、聽教聽話？你哋知唔知呢句說話，係抹煞晒所有父母，特別係我呢類情況嘅父母嘅努力？有時唔係我哋唔識教、唔想教……

如果有一日喺街上，大家遇到有啲好曳、唔聽話、情緒失控嘅小朋友，可以唔可以包容同體諒一下，唔好拍片擺上網公審，唔好一句「唔識教唔好生」嚟發洩你嘅不滿？因為呢啲好大機會都係ADHD或者自閉症譜系嘅小朋友

我相信，同我有同樣情況嘅父母，對各位受困擾嘅人士都感到抱歉，但能夠得到大家嘅體諒，係對我哋最大嘅鼓勵

我亦想鼓勵有同樣經歷嘅父母：「辛苦你哋喇，你哋嘅努力同用心嘅照顧，小朋友係感受到，所以唔好氣餒，大家一齊加油」

讀者投稿@加油媽媽