![](https://i0.wp.com/backup.parentlicenses.hk/wp-content/uploads/2022/02/img_2848.jpg?resize=326%2C234&ssl=1)
#ParentLicenses1665
呢個新年發生咗件事,同埋睇到前排 #ParentLicenses1658 個post,令我忍唔住想投稿
我表姐40+有個拍咗10年拖嘅男朋友,佢聲稱喺剛拍拖嘅時候,男朋友表示會同佢結婚生仔
喺佢哋拍拖第二年,就反而係我先同另一伴定下婚約。表姐知道咗後,就問我用咩方法令我老公同我結,我隨口答佢:「我無用咩方法,都係正常同男朋友拍幾年拖,大家覺得啱就結,就係咁簡單……」
其實我當時都唔知點答佢,不過我後來知道表姐事後係咁借我結婚嘅事同佢男朋友催婚
喺我結婚大日子嗰日,我知道其中一個姊妹嘅男朋友都準備同我嘅姊妹結婚,佢仲一早已同我夾好咗,想我將花球拋俾佢,其他姊妹都同意會幫手成事,大家都好高興
正當喺拋花球嘅時候,表姐想出嚟接,我唯有低調地同表姐講。事後表姐當然就好失望,但竟然喺拋完花球後,佢走去問我個姊妹借個花球影相
當日表姐係著咗條全白色嘅長裙出現,仲起勢咁捉住攝影師幫佢同佢男朋友影相
婚後,我從親戚朋友口中講到表姊恨嫁,又話:「點會喺人哋結婚嗰日著白色,覺得好唔尊重」
我事後諗起都覺得表姐呢個行為怪怪,不過算啦,都結完
我結婚後兩年就有咗小朋友,表姐又嚟啦,今次佢問我有咩方法令我老公同我生
我當時個反應真係:「屌!點解你講到好似我逼我老公生咁嘅?」
咁我都「正常」解釋返:「我無咩方法,只係同老公傾過呢個問題,大家都希望生,所以咪有囉」
表姐就開始緊張同急:「我哋都拍咗幾年,係時候要結婚」
我就同佢講:「咪同男朋友傾下囉」
表姐:「我傾過,但男朋友無表示,仲講咗句『就算結都一定唔會生』」
表姐好灰,原來佢仲走咗去做雪卵檢查,但無奈醫生話最好係叫埋另一半,將精子結合咗先雪,所以最後佢都無雪到
直到今年年初一,大家拜年見面,佢突然拎出利是俾我個仔,咁我個仔就講「多謝啦」,之後佢叫我個仔要多謝埋「表姨丈」
我當下係打個突,而我見呀「男朋友」都打個突,我個仔就呆咗嘅,因為我個仔一直都係叫「XX哥哥」
我個仔就好直接問:「點解佢係表姨丈,佢係XX哥哥」
男朋友好快咁答我個仔:「我唔係呀,叫埋我XX哥哥就得」
我以為件事完咗啦,返到屋企後呀仔同我講話我表姐好惡,我仔復述我表姐嘅說話:「你以後要叫『表姨丈』,如果唔係就係無禮貌同曳,媽媽會罰!」
我仔就好驚同委屈地問我點解我要罰佢。我好嬲,我即刻打俾我表姐問佢咩料。表姐仲好似若無其事咁覺得好小事,我做乜咁緊張嘅態度
表姐:「我哋兩公婆都拍咗拖咁多年,都係我老公啦,叫『表姨丈』有乜問題?」
我:「當然有問題啦,你自己想我個仔點稱呼,我控制唔到,但你而家屈咗落我度,仲要嚇我個仔,我個仔就好委屈覺得我要罰佢呀!同埋搞亂咗家人關係,你叫我點同呀仔解釋返?同佢講『無結婚都係咁叫』呀?」
表姐就發我脾氣:「我做咁多嘢都係想生仔,你唔幫手又唔share你用乜方法去令你老公同你結婚同生仔!」
最後我無理佢cut咗佢線
呀表姐,你係咪戇鳩㗎,你嗰句「我兩公婆拍拖咁多年」係咩邏輯?兩公婆就兩公婆,拍拖就拍拖,同埋我勸你真係唔好生,你真係要考咗牌先
另外,呀「表姨丈」,我唔知表姐有無同你講,無嘅話,我希望你睇到同考慮清楚你身邊嗰個使唔使去考牌先!
圖片來源@十萬個激嬲女友的理由
讀者投稿@恨結婚生仔嘅女人個表妹