#ParentLicenses2724

大家好，容我簡單介紹一下我自己——我係一個12歲嘅學生，前排我同細佬去咗以冒險為主題嘅樂園玩波波池

有去過同一間嘅人都應該知道，嗰度嘅波波池好大，有唔少嘢玩。而嗰度除咗好大嘅波波池迷宮之外，重有一啲硬嘅積木可以俾年齡較少嘅小朋友埋砌，砌唔同嘢等等

嗰時我同細佬一齊一開始就已經衝咗入去個迷宮入邊跑玩，後尾冇幾耐我哋逐漸感到無趣，於是就去咗砌積木嗰度打算砌間安心嘅屋仔喺入邊打卡影相

我哋對其他小朋友都會比較友善，當佢哋問我哋可唔可以一齊玩時，除非我哋有特別事或者自己額外嘅事想做，通常我哋都會同佢哋一齊玩

喺我哋砌屋仔砌到差唔多完成嘅時候，有位目測兩至三歲嘅女仔，突然闖入我哋間「屋」。再兩三秒之後，女仔嘅爸爸都喺後面係咁叫佢出返嚟，著佢唔好阻住哥哥姐姐，然而嗰位妹妹冇諗住出返嚟

個女仔喺我哋間屋嗰度係咁掟嘢（因為未砌完，間屋入邊重有唔少積木，雖然係發泡膠，但攞嚟掟人都幾痛），途中亦都掟到我哋

妹妹嘅爸爸亦都好努力去叫，抱妹妹出嚟

最後妹妹都係整冧咗我哋間屋，砌咗半個鐘嘅嘢，結果我哋都冇為間屋影相就咁冇咗。當時嗰位爸爸亦都有同我哋道歉，教佢個女

喺佢整冧咗間屋之後都係得返10分鐘遊玩時間，所以我哋都冇時間砌返好佢，（就算砌返好都要走㗎啦）所以索性去返迷宮嗰度玩捉

我知道間屋未必係一件好有價值，好寶貴嘅嘢，但係對我嚟講，佢係我用咗好多心血先砌好嘅一間屋，而且係我同細佬一齊砌嘅屋。我哋好努力守護佢唔俾其他小朋友破壞，但就係因為嗰個突如其來嘅妹妹搞爛咗我哋間屋，老實講都好傷心

你亦都可能會問：「點解你12歲重可以入到去？咁你重入去同你細佬玩？預咗俾人搞破壞，你做咩唔反擊？影咗相先？

其一我身高148，其二嗰個砌積木嘅池冇年齡限制，我哋亦都係特登搵一個唔顯眼嘅角落頭砌嗰間安心嘅屋，嗰陣時連間屋都未砌好，所以我哋亦都未影相

嗰位爸爸好好，好負責任，會主動同道歉，佢亦都好努力去叫妹妹唔好搞我哋間屋。但間屋砌咗咁耐就咁突然之間冇咗，純粹喺嗰一秒同埋離開咗樂園之後，令我會不停諗件事：其實如果我係咪嗰陣時唔嘥時間去整呢啲嘢，又或者同細佬一開始入去就係嗰度玩，再或者唔入去嗰個區域，就唔會發生呢啲咁嘅事呢？佢唔係一啲咩重要嘅嘢，只不過砌咗咁耐，難免會唔開心

其實我寫咁多嘢，的確只係為咗發洩，我再升高兩厘米就唔可以再入去玩，而今次亦都可能係我最後一次入得去。之前亦都見過好多好曳嘅小朋友，佢會特登行埋嚟打你、騷擾你。嗰一刻開始，除咗我識嘅人，我已經對一啲兩至三歲嘅小朋友反感

真心希望未來更多家長可以知道「生仔要考牌」，唔好再殃及池魚

讀者投稿@一位路過生仔要考牌系列嘅人