#ParentLicenses2238

今日同小朋友去playhouse玩。呢間playhouse嘅中心位置，放置咗好多超巨型嘅發泡膠積木俾小朋友玩

有一個七八歲左右嘅女仔將所有積木疊起成為一個長方形圍住自己，我聽到佢同一位唔知係婆婆抑或嫲嫲嘅長輩講話係城堡

及後，呢位小朋友拎埋場地嘅化妝箱玩具同皇冠入去佢嘅「城堡」內自己一個玩，玩咗好耐，起碼超過半小時。佢重成日出去玩其他嘢，然後又返嚟，而佢位長輩就即刻守護佢個「城堡」，一切都唔俾人掂

中途起碼有十個小朋友好想加入或者摸下啲巨型積木，就算個小朋友走咗去，個婆婆或者嫲嫲都會喝止，而且語氣好粗魯咁同其他人講：「No！」「唔好掂啊！」「唔好拆啊！」「唔玩得啊！」「點解啲小朋友咁無家教！」「你去玩其他嘢啦！」（下刪一百字）

當然啦，呢個小朋友發現有人想入侵佢個「城堡」時，亦都會用同樣語氣喝人走，更會摺摺聲咁話：「我唔俾你玩啊！走開啦！係我㗎！」

最正係呢位長老竟然同個小朋友講：「其他小朋友太曳啦！你唔使理佢哋㗎！你返去話俾媽咪聽啦！」

最後見到佢哋兩個無玩任何嘢，只係喺「城堡」側邊睇電話，但都要用隻腳繼續覇住成set玩具。目測佢霸住呢set玩具已經起碼四十五分鐘，重要鬧人，我都想知佢媽咪知道會點講呀

圖片來源@西遊記之月光寶盒
讀者投稿@佢係咪覇道嘅被害妄想症患者？