#ParentLicenses2651

話說今日見到某平台有媽媽發文，佢話自己小朋友啱啱高小，放工返到屋企八點半先教功課，搞到好夜，常常同個仔因為功課晚晚嘈

我就覺得奇怪，小朋友都放咗學咁多個鐘，唔係可以自己做咁啲先咩？四年級嘅年紀應該有能力可以自己做咁啲功課啩？我再睇下留言，唔係話「而家程度深」，就係話「小朋友唔自律、唔叻」

我想話就算係程度深，個細路喺學校都會聽書啩，唔識極應該都有個譜，但如果佢係上堂發夢，其實你返嚟教都無咩用。而自律呢家嘢，我理解小朋友唔係個個都可以好自律，咁家長呢個角色就更加重要。正如一班小朋友放學，個個都又跑又叫會嘈到人，自律嘅唔會咁做，但又跑又叫個啲家長，有人會由小朋友自由發揮，有人會叫住啲小朋友，捉返住佢，問題喺邊就唔使講啦

然後有個媽媽話自己都係咁，屋企得老人家教唔到，個小朋友又有ADHD，所以小朋友放學係返去打機畫畫，等佢收工先教

我睇完完全係黑人問號？放學精神都唔會剩返好多，然後拎咗去打機畫畫，做完呢啲都攰啦，跟住先做功課？更甚係佢有專注力不足，唔夠精神本身無問題都好影響專注力，更何況小朋友係有呢個問題？之後再掃落去啲留言，我再見佢好霸氣咁留言「淨係返工辛苦？全職唔使做嘅？」

不過返全日多功課真係比較辛苦，又要做功課又要溫書，不過既然係咁，就更加要訓練佢咃自己去獨立完成，屋企人無可能一直幫落去㗎。至於係唔係全職，每個人都有自己嘅嘢要做，小朋友都要學識安排時間同完成自己責任，若果真係唔得，功課輔導或者去補習其實都只係表面嘢，除非真係搵到個好好嘅導師，如果唔係，佢真係只係幫你小朋友「完成」功課，最後受害都係小朋友同大人

相片來源@都係阿媽
讀者投稿@都係阿媽