#ParentLicenses2011

首先形容一下我屋企嘅家庭背景。我今年就20歲，家境貧窮，細細個讀幼稚園個時因為阿媽吸毒，所以就被社署扔咗去寄養家庭度住，住咗一年多啲又跟返阿媽。我記得嗰時我被寄養家庭啲姨姨打我，所以先跟返阿媽嘅。而我重有個家姐，佢大我5年，佢就住兒童之家，印象中係小六住到中六

去到我小一至中一左右，期間都住過3次兒童之家，但都係住半年至一年左右。去到我中一嘅時候，阿媽衰毒品入咗去坐監。因為當時我未夠18歲，又要去住宿舍，嗰時我又擔心我阿媽，同時又好憎佢

由我細細個時，阿媽已經當住我面吸毒，重叫我唔好話俾人聽。直到到佢出返嚟，佢又係繼續食。然而我同阿媽嘅關係都好似朋友咁，即係可以一齊食煙，好輕鬆咁相處，所以會幫佢保守秘密

我由中一嘅時候已經學壞咗，成日唔返屋企，而且我14歲已經冇返學。嗰時識咗個男朋友（大我7年），就去咗佢屋企住

阿媽問我借錢，因為佢知我男朋友有返工（小學嗰時儲低嘅錢，佢都試過問我借，拎晒全部錢，但都冇俾返我），佢每次都係借$300至$500，一個月一次咁

我下一個男朋友係做地盤，嗰時我15歲，男朋友大我8年。因為我15歲都有開始返工，阿媽就變到借多咗

我同呢個男朋友一齊咗3年，加埋我男友嘅錢，可以話我阿媽係借咗起碼幾萬蚊，但佢都係冇還過。另外佢係有拎綜緩，重有我個名，即係拎二人份，當中都有$9000左右。雖然有我份，但我$1都冇拎過

但又因為有我名，所以我要參加嗰啲自力更生嘅計劃。每兩星期一次，我要特登上去交啲搵工資料，但明明我係有返工，但佢想呃綜緩！嗰時我返全職，一星期放得一日，都要山長水遠去新界嗰邊交「功課」（嗰時同男友搬咗出九龍租屋住）。我一直叫佢cut我綜緩佢又唔肯，嗰時我真係覺得好煩

直到我19歲，同下個男朋友結咗婚，重有咗小朋友，我阿媽仍然都係唔肯cut我綜緩，要我陀住個肚繼續去到大西北咁遠🫠，係卒之到我生咗後，佢先至肯cut

我阿媽根本就係用啲錢嚟食毒品！

喺1月嘅時候俾咗$53000禮金佢，佢3月又問我借錢，我真係覺得好煩。我自己有咗之前返工，死捱死慳儲咗$10000，之後keep住返下炒散，一年都未動用過嗰$10000

講返之前12、13歲時成日搬屋，有次搬咗去村屋，領養咗隻唐狗（本生都有兩隻狗），阿媽都同意嘅。但我認我自己衰，嗰時又係日日出街，一星期先返屋企幾日，屬於嗰啲剩係鍾意玩，又唔想照顧佢。到15歲同嗰時嘅男朋友租屋住，就帶咗隻唐狗一齊，但之後分手，又擺返喺阿媽度。擺喺阿媽度嗰時，我都有一個月俾$500佢，同埋佢每個月都會借$500至$1000，當然係冇還嘅。去到再後期啲，同而家老公一齊嗰時，佢有時係有借有還嘅

以前租屋住或者住男朋友度少返屋企，佢都唔會搵我，但搵親我都係為借錢，就算我生咗BB後都係咁。然而，生完BB之後使費係多咗，我同老公係可以顧掂雙方同埋個仔嘅錢，但我阿媽又係一直問我借，我真係好苦惱

因為我知我擺咗隻狗俾佢湊又冇俾錢佢係好不負責任嘅行為，但係佢無可能一個月要用咁多錢去處理日常生活同養狗，我之前租屋出去住嗰時，所有嘢都自己俾，所以我知係要用幾錢

到近排佢又問我借，所以同佢嘈咗交，佢block咗我，而家又嚟whatsapp我老公借錢，究竟我重借唔借俾佢好？我自己嘅感受係，我自己一個月都唔使用咁多錢，養埋個仔都冇佢使咁多（我知係食毒品，但佢自己話唔係）。佢之前係用我返工嘅錢嚟食毒品，我就死捱死慳先生活到。當然而家係好啲，但都只夠兼顧我哋一家三口

純粹想講下同埋想你哋俾下意見，Sorry for 1999🙇🏻‍♀️

圖片來源@門徒
讀者投稿@長文慎入