#ParentLicenses2479

有時候真係唔係好明白點解做咗人哋媽媽爸爸嘅人，重可以好似個大BB咁「飯來張口，衣來伸手」

就以幼稚園群組為例，佢哋連叫自己學校校長寫封推薦信，都要喺WhatsApp群組伸手攞範本。其實佢將喺群組所問人嘅同一條問題，直接打落去Google或者AI程式，已經直出好多範本俾你

有啲更誇張，例如替小朋友搞網上申請入學，唔記低個申請編號都算啦，到要用嘅時候，竟然又係喺WhatsApp群組問其他家長點算！？君不見學校有電郵回覆上面有寫個申請編號，再唔係自己打返去問學校又有幾難呢？

雖然疫情已經過去，但仍有啲名校係維持用拍片當作首輪面試之用。學校都寫到明要拍啲乜嘢，乜嘢可以做，乜嘢唔需要，甚至圖文並茂教家長點樣上載，有咩格式要求等等，但都仍然有一堆人喺WhatsApp群組入邊問呢樣得唔得，嗰樣得唔得，點做，點處理云云。其實所有家長都係睇同一封電郵，睇同一份通告，睇同一個指引，點解會有家長問返人哋轉頭。人哋答你「得呀，可以放埋郭sir 啲相落去呀」，唔通你又真係會放咩？

大佬呀！都做人哋爸媽啦，連呢啲少少解難能力、分析能力都無，重成個大港童咁咩都伸手問人，唔羞？

當然有人會話「唔識咪問，個群組嘅用途就係咁，大家開心share，唔鐘意咪quit」

呢啲「伸手黨」一般都係free-rider，從來都無喺群組分享過任何有用資訊，而且問啲問題真係好廢，直頭侮辱緊其他喺群組入面嘅家長，又唔睇返或搜尋一下之前有冇人問過，只會問完又問

有時候我都會分享一下育兒心得、遊玩好去處等等，希望大家交流一下。有家長會私下WhatsApp再追問一下，然而問完又係一個「唔該」都無

利申：我就已經自行退出群組，打呢篇文章當係發洩一下，同埋希望港童爸媽反省一下，身教都重要呀。小朋友唔係歲半讀N前識晒A-Z就叫叻，學會解難能力同分析能力先能夠幫到小朋友一生

讀者投稿@新手老師奶媽媽