#ParentLicenses2195

又係我代課老師呀👋🏻👋🏻當我見到家長竟然有睇而大家又討論得咁熱烈，我決定再上一上嚟！

首先要多謝咁多位，亦請大家放心，我諗我唔會無咗份工嘅🙏🏻🙏🏻見到我將會收到投訴，我經已同主任同校長備咗案

同時，我想借呢個機會多謝咗主任同校長先，因為其實喺我備案一刻，我都擔心中心會唔鍾意我將中心同家長嘅事放上網

誠然，當我同主任同校長備案嘅時候，校長係用「unreasonable」呢個字眼去形容第一次家長嘅投訴（即係佢話我讀錯小朋友個名嗰件事）。而校長對主任同我處理第一次投訴嘅方法係覺得「make sense」

我估計家長應該會投訴我將件事放上網，以為公平公正，所以我都將我個原post喺主任面前翻譯俾校長聽，由主任作為第三者去睇下我嘅翻譯有無偏頗

校長表示，雖然家長會知道係講緊佢，但只係講咗一個名，又無洩露敏感資料同學校資料，基本上唔會牽涉法律或犯法問題，所以呢個係屬於老師私人事件。當然校長亦有提醒我，要保護自己就最好唔好，但佢對呢個行為係無意見

校長亦指出，我哋中心有法音班，如果我哋會教到「Joan」呢個發音，相信老師係會根據國際音標去教，但強調家長亦有權去自行教發音，只要唔干涉我哋課程就「up to her」

另外，校長同主任同時都指出以下幾點：

1. 當我發現讀音有差異時，我尊重小朋友同家長，無同佢拗，第二日即時道歉
2. 因為我代課課程唔係屬任何英文班或與英文有關，所以唔需要評論讀音正確與否，所以唔涉及我嘅教學水平同資格
3. 雖然放呢件事上網係有「risk」，但根據個post內容並無牽涉法律或犯法問題，所以中心都唔會干涉

最後，我自己都想強調，我並無任何意思同家長你去爭論個讀音，喺我第一次聽到小朋友話我讀錯時，我已經知咩事而去配合你哋嘅讀音，我只係唔明點解咁芝麻綠豆就會可以形成一個投訴

讀者投稿@代課老師