![](https://i0.wp.com/backup.parentlicenses.hk/wp-content/uploads/2024/01/2421.png?resize=740%2C740&ssl=1)
#ParentLicenses2421
件事都過咗一段時間,嗰陣時我個女啱啱滿一歲左右,我同佢去咗中山公園玩。玩咗一陣後,咁見到啲小朋友開始放學啦,現場開始多人,咁我哋就走咗啦
出咗公園,我拖住阿女行緊去天橋,有個大約六至八歲嘅哥哥拎住塊浮板迎面而來,好大力咁打落我個女度。條路好闊,我斷定呢個哥哥唔係唔小心撞到我個女,回想頭先喺公園亦無同佢一齊玩過或者碰撞過
個𡃁仔打完我個女,佢竟對住我做咗個鬼臉後即刻跑走咗。無啦啦被個見都無見過嘅人打,阿女立即驚到喊都喊唔出,只係呆咗喺度
當刻我掛住安撫個女而無去追個𡃁仔,我真係無諗過一個咁細嘅小朋友會有咁大嘅惡意,無怨無仇走去打個一歲嘅路人,講緊係即使見我拖住個女,佢都照衝埋嚟打佢,試問佢再大個少少會係點樣蝦其他人呢?
啲人成日話所有小朋友都係白紙,係天使,但係經過嗰次事件之後,我覺得有啲小朋友比大人係更加恐怖
我諗我唔會再見得返個𡃁仔問佢點解要咁做,惟我永遠都會記得呢一幕
希望大家好好保護自己嘅仔女,唔好被人傷害,亦都好好教導自己嘅小朋友唔好做一個傷害他人嘅人
打字都打到好嬲呀!
讀者投稿@三唔識七做咩打我個囡