#ParentLicenses2398

「家用」真係一樣破壞家庭和諧嘅嘢，重會令到兄弟姐妹反目成仇

我喺一家五口入面排行最細，家住公屋，啊媽重男輕女，而啊爸嘅價值觀就係覺得拎錢返屋企就得，而且佢返夜班，所以我哋好少見到面

因為有我嗰時啊媽同啊爸關係好差，根本唔想要生多個，我嘅出現係意外，而且又係女，所以啊媽一直唔鐘意我。懂事以嚟，佢就同我講根本唔想生我，話我係多餘，本來就想落咗我，陀住我嗰時佢成日同啊爸鬧交飲醉酒，又跌親肚落地，重諗住我係唔會出到世

啊媽：「點知你咁都死唔去」

一路我都活得好卑微，自細我所擁有嘅玩具同衫都係啊哥家姐唔要嘅俾我。我媽唯一會讚我就係會讚我乖不爭不搶。記得小學有一年我問爸爸可唔可以買個玩具俾我，佢買咗，之後啊媽發現後就鬧足我一個月，指責我厄啊爸錢

到我大咗，啊媽用晒屋企積蓄送咗啊哥家姐出國讀書。我中五嗰年家長日，班主任同啊媽講話我其實讀得幾好，如果努力啲可以讀到大學

然後返到屋企，啊媽同我講：「你係女仔，唔使諗讀咁多書，大咗都係嫁咗去」

後來我自己報咗個課程讀，考入學試pass咗。我問啊爸借第一期學費，之後嗰啲我自己會半工讀，讀完會還返錢俾佢。啊爸答應咗，但就喺要交學費嗰日我問啊爸拎錢，啊媽聽到隨即刻鬧啊爸：「你唔係真係諗住俾錢佢啊？！」

啊爸好無奈同我講啲錢喺晒啊媽度，佢都無辦法。啊媽重特登打長途電話俾啊哥家姐話我想呃啊爸錢，佢哋特登打返嚟鬧我，話佢哋讀書要使好多錢，生活費都唔夠，要佢哋自己打工賺，再話我無人性，唔該我唔好再俾麻煩佢哋云云

到最後我讀唔成，出去搵咗份收銀做，開始俾家用。啊哥家姐知道咗後打返嚟讚我乖，又話我生性

直到啊爸啊媽離咗婚，啊哥家姐重喺外國讀緊書就係我惡夢嘅開始

我媽會成日為咗出氣而鬧我，例如話我唔幫手煮嘢成個大爺咁，當我入去廚房問佢想我做咩時又大鬧叫我死開，唔識整唔好搞亂佢啲嘢，甚至講晒粗口，幾難聽嘅說話都有，又話佢咁辛苦忍到我讀完書先離婚我咁樣對佢。但我都唔知道自己做錯咩，到最後佢直接趕埋我出門口

我搬咗去男朋友屋企住，佢屋企人對我好好。我夜咗返屋企，佢哋重會留飯餸俾我，重要唔係食剩撩到爛晒得返頭尾嘅餸，係明顯食之前特登先夾起留俾我嘅餸。因為我唔想白食白住，遂出聲話俾錢。佢媽唔肯收，話一家人唔講錢

後來因為男朋友嘅細佬財政出咗啲問題就一家四口搬咗返嚟住，所以我同男友就搬出去租屋，俾多啲空間佢哋。我同男友人工都唔高，而且屋租好貴，每個月都啱啱夠錢，所以無再俾錢啊媽

到啊哥家姐讀完書返嚟，佢哋就要求我俾家用佢哋，事因佢哋要同啊媽住。佢哋話啊媽成日煮嘢，直頭曬埋佢哋一家屋租水電煤上網費俾我睇，著我俾返三分之一做家用俾佢哋

我嗰時真係無錢俾，就俾佢哋兩個輪流道德綁架我，例如「啊媽你有份，你有責任養！」「嘩！你真係完全唔理屋企㗎喎！」

我同佢哋解釋我哋租好貴，真係無錢。我建議一係我就喺佢哋間公屋度除名，申請一間自己嘅，到時租平好多就有錢俾得到。點知佢哋好反對，話間屋係五人單位，因為父母離婚時啊爸已經除咗名，如果我都除埋名就生怕房署要佢哋搬去細啲嘅屋。講到底係佢哋喺外國讀書時住慣大屋，返到嚟就已經覺得好迫好辛苦，所以先託辭唔可以住再細嘅屋而已

如果我哋要住公屋就搬返去同佢哋住，我同家姐同啊媽一間房，男友瞓廳。我男友當然唔肯，覺得太無私隱。我爸後來知道後，佢提議話將佢啲積蓄拎出嚟，用嚟間多間房出嚟俾我哋。佢哋知道即刻勁嬲，叫啊爸唔好拎。家姐話佢咁多年都係同啊媽一間房夠無私隱啦，就話我男友憑咩講私隱

最後當然無搬到，期間又不斷俾佢哋道德綁架。我最後好嬲話：「其實啊媽同你哋住，佢做晒成屋所有家務，你哋又有公屋已經賺咗，請個工人都唔止呢三分一開支嘅錢」佢哋鬧我竟然將個啊媽比喻做工人

其實自從啊媽趕咗我出門口後，佢一路都無聯絡過我，只係啊哥家姐開個family group強拉我入去，去睇佢哋平時嘅開支，或啊媽睇牙要用錢等等。我有提議過啊媽可以好似啊爸咁申請間一人公屋拎綜援生果金都足夠生活，因為啊爸就係咁生活。佢哋唔肯，因為如果啊媽要拎一人公屋，佢哋就要除名出去捱貴租

後尾我男友升咗職，公司想派佢去加拿大，咁我哋就結婚一齊去，老爺奶奶都好贊成，佢哋重幫我哋落手落腳搞婚禮，錢都係佢哋墊支先。當然我家人無出現，因為佢哋覺得我搞婚禮係浪費錢，如有錢都應該俾佢哋，佢哋都會俾說話我聽話無錢出席

幸運地好順利咁搬到去加拿大，一開始要適應好多嘢好忙，我又無工做成日屈喺屋企，再加上啊哥家姐個個星期都問我搵到工未，話我逃避現實，重叫我玩多半年好啦，重未有工做就要返香港。一路逼迫到我患上抑鬱，要睇醫生。醫生勸我少啲同佢哋接觸，所以我成日都唔覆佢哋。當地醫生覺得「家用」呢樣嘢唔應該有，父母生仔並唔係投資，叫我根本唔應該俾錢佢哋，唔需要有壓力。我同醫生傾完後我覺得好啱，亦輕鬆咗好多。到有一日，佢哋打比我話啊媽一路都好想移民，好想去加拿大，話加拿大環境好好，就想我申請佢去。我唔肯，佢哋叫我自己打去同啊媽解釋

到後來老公嘅工作都穩定，我又搵到工做，老爺奶奶俾咗啲錢我哋做首期買樓。啊哥家姐知道就質問我點解有錢買樓無錢俾家用，又話上星期佢買咗個洗衣機俾啊爸要幾多幾多錢。又話啊爸喺我由細到大俾過嘅零用錢加埋要三萬蚊，叫我還返比啊爸，重話你唔係諗住唔還呀？

最後我將原本要嚟買梳化、衣櫃嘅錢過咗俾佢哋。但我都有打去問啊爸要唔要我還錢，佢話唔使，俾咗你就係你，重話佢最近俾晒所有積蓄三十幾萬佢哋，佢哋嘅理由係怕啊爸老，有乜事要應急用。後來發現佢哋拎咗去轉人仔做十年定期存款

最後一次係佢哋話屋企好舊好殘要裝修，著我同老公拎錢出嚟夾。我唔肯，佢話用我名去申請啲唔知咩政府資助拎啲錢出嚟，直接幫我簽埋名。我當然唔肯，呢啲唔合法。如果你夾硬簽我名，我係唔會認係我嘅簽名

點知佢哋大爆發話我咁多年一毫子都冇出過，無人性。我反話：「啊媽點對我？咁多年一個電話都無打過俾我」

佢哋話我當自己係悲劇主角，不停話我有精神病，話佢哋一路都無逼迫過我。佢哋又話啊媽好公平，從來無對我不公過，最後我哋不歡而散。喺心理醫生建議下我改電話自我消失，終於過返個唔使俾人逼迫嘅人生

有時我會諗如果無家用呢樣嘢，如果父母生小朋友唔係為投資，如果父母有自己嘅退休計劃唔需要將養老嘅重擔落喺仔女度嘅話，呢個家會唔會唔一樣？我好羡慕老公一家人，老爺奶奶每星期都會打視像電話俾我哋，問我哋今個星期過得點，又會分享佢哋做過咩，令我感受到咩嘢係家人真正嘅愛同關心

讀者投稿@文長對不起