#ParentLicenses0859

我未試過聽到一個朋友生咗BB啦……而我講唔出任何恭喜嘅說話

女性朋友好幾年前識咗個男人拍拖。個男人離過婚，同前妻有2個女。我朋友喺佢哋屋企人面前一直都不被認同。果時我覺得佢好慘。呢個朋友同咗呢個男人一齊之後，我哋都少咗好多聯絡

直到有一日……佢突然間宣佈話自己懷孕啦！

原來佢個肚已經成4、5個月，但佢話佢從來都未去過產檢。原因係：冇錢搭車去做產檢……呢個理由嚇親我哋身邊所有朋友。個個一聽到都立刻夾錢畀佢，希望幫下佢手

直到呢個BB出世，我哋都不斷聽到佢點樣冇錢法，我哋又幫手夾下奶粉尿片畀佢啦

果時，我哋先知個男人原來打份日薪好低嘅工，每日嘅錢都唔多。我哋都勸佢，叫佢男人轉份長工，然後叫個女嘅自己出嚟返工。然而，朋友用一堆理由開脫而冇咁做

時隔一年多啲……我哋又聽到佢又宣布懷孕！

我哋都覺得點解冇能力仲要生丫？朋友又係講果啲：「男人唔帶套，我都冇辦法嘅」

我聽完已經好嬲，我決定唔會再幫佢任何金錢上嘅嘢，同時開始疏遠咗佢啦

當然，第二個孩子出世前後，佢都不斷有唔同理由向身邊嘅朋友借錢，例如：「冇錢交電話費」「冇錢交水電」「冇錢買飯食」等等，仲有啲心軟嘅朋友都仲會繼續借畀佢

佢向朋友透露講自己喺男家人面前都仲係得不到歡心丫。最無聊一件事係，佢覺得前妻有2個小朋友，佢覺得自己輸！所以要生2個

又事隔一年幾左右，我哋又聽到佢宣布……佢又大肚啦！

嘩！我真係粗口都飛埋出嚟。我冇理佢啦，斷絕來往，唔想知佢嘅事，不過我知佢曾經打電話畀我個朋借錢

內容大致係佢養唔起啦，想落仔！叫人借錢畀佢返大陸落仔

我朋友當然拒絕借錢啦！然後佢向我朋友講： 「你唔借錢畀我呢，我冇得落仔㗎啦！係你迫我生嘅 ！」

嘩，講得出呢番說話嘅都知有幾痴線，大家都費事睬佢

呢幾年，基本上，佢除咗會借錢嘅時候會出現之外，其他時間都係完全無消息嘅

半年前，我都又再收到佢想借錢嘅電話：「大嘅一日得2包餅咋」「成日都未食過飯」「有錢嘅，但提款卡唔見咗丫。你入支付寶畀我啦」，期間仲要畀你聽下啲B喊得幾慘烈

我都堅持拒絕佢，我坦白同佢講：「你養唔掂就拎去保良局！起碼幸福過跟住你！」

自始又神隱咗……

到最近我又收到消息……佢啱啱生咗第4個！我真係唔識講恭喜……恭喜唔落丫！

孩子唔係工具，唔係呃綜援嘅工具，都唔係要嚟綁男人個心嘅工具，亦唔係拎嚟做借錢理由嘅工具丫！

P.S.：千祈唔好問個男人喺邊度或者做緊咩，我唔知，我淨係知廢柴一名，姑爺仔咁嘅樣

讀者投稿@孩子不是工具人