#ParentLicenses0913

我係屋企最細嘅囡（22歲），對上有二哥（2X歲），大哥（3X歲）同老豆阿媽。阿媽係全職家庭主婦，細細個屋企有少少錢，請得起工人，大陸仲有層樓

但自從老豆退休，屋企環境差咗好多，大陸層樓賣咗，而我兩個阿哥每日留喺屋企打機，終日無所事事

二哥係典型媽寶，中六畢業之後冇返過長工，中途試過返短期工（1-2個月）。幾年嚟都冇朋友約出街，至今每日留喺屋企打機+陪我阿媽買餸

大哥三十幾歲人，諗嘢仲好似十歲小朋友咁，連配副眼鏡都要阿媽陪，份份工都返唔長。體型肥到有啲病態果種，每日至少飲幾罐汽水咖啡。之前仲試過明明被人炒咗，但仲日日朝早出門口扮返工，最後被我阿媽發現咗。最近佢又屎忽痕讀返書，仲要係IVE果啲high-dip，我阿媽仲讚成

而最扭曲嘅係，我屋企人之間可以幾個月都冇計傾，因為每人一間房（包括我老豆阿媽，已分房三年）。好羨慕人哋屋企人食飯有講有笑，得我會同老豆有一兩句，我從來冇見過兩個阿哥傾過計，而老豆阿媽鬧交都係同錢有關

而造成今日呢個局面嘅——係我阿媽。我阿媽全屋最大，有佢講冇人講，典型重男輕女思想。由細到大灌輸老豆啲衰嘢俾我哋，成功令大哥二哥唔鐘意老豆

有時老豆同二哥有爭執，我阿媽仲會講：「都唔知佢哋係咪前世撈亂骨頭，哈哈！」

我心諗：「下，點解你講得出呢啲說話，你好開心見到自己屋企人關係唔好咩？？」

總之，離間屋企人關係係佢興趣之一

最後講下全屋最卑微嘅我。我一邊返大學，一邊幫人補習教畫，自己錢自己賺。自問好努力讀書，今年順利大學畢業，但屋企冇人恭喜過我；好不容易揾到份full-time，唔夠錢洗都俾阿媽家用5千蚊，原因係俾完家用果幾日阿媽會對我好好

知道依家個市好淡，好難揾工，尤其是我阿哥呢啲低學歷人士會越來越難揾工。曾經俾過意見阿媽叫阿哥返工，但冇人聽，因為阿媽最愛係佢兩個寶貝仔；我好想盡力改變屋企現狀，但冇用

最黑暗嘅係大哥毁我嘅童年，佢會趁我瞓覺嘅時候整我對腳。細個唔識諗，依家大個諗返覺得好嘔心，我帶住呢個心理困擾活咗十幾年，好幾次夜晚諗起就喊濕枕頭，依家見到佢簡直就係折磨

家人對我來講係真係緣淺，直到依家我遇到我男朋友，我第一次擁有幸福嘅感覺，我仲慢慢學習接受過去，但真係好難

我以為自己一世都冇勇氣講出口，依家竟然完完整整咁打晒出嚟

最後，多謝睇到呢度嘅你

讀者投稿@鼓起勇氣的人