#ParentLicenses2245

純粹覺得小朋友好慘，請原諒我厚多士

今日下午三點零鐘，氣溫32度，我哋由荃灣西鐵站搭43號巴士。眼前呢位女士帶住兩個小朋友，大嘅目測五六歲，細嘅目測一歲

女士一上車自己係抱住一歲BB坐圖中呢個位置，而個大嘅自己坐右邊嗰行嘅最前位置，無扣上安全帶，旁邊亦無大人

萬一司機急剎車小朋友係絕對會向前撞，而當時車上就有兩位姨姨發過聲：「小朋友咁坐好危險，你坐返小朋友隔離啦」

女士就話：「我湊過好多個㗎喇，無問題㗎，佢鍾意自己坐」

呢個時候一歲BB開始扭計，女士去拎嘢食俾佢，居然係爆谷。對唔住，我真係怪獸家長，我真係唔會敢俾一個啱啱識企未識行嘅BB食爆谷，驚梗親

個BB食咗一粒爆谷後仍然不停大喊，不過女士都只係撳緊部電話，車上乘客們再次睇唔過眼叫佢理咗BB先。女士表示佢要睇咗班車先，只係不停大聲叫BB：「咪嘈啦！咪喊呀！」

如果大家經開荃灣西鐵站巴士總站，因為空氣唔流通，就會知道嗰度係幾焗。雖然後來上咗巴士，但係因為巴士啱啱先開，幾乎係冇冷氣，而當時天文台體感溫度係39度。所以排除BB因為眼瞓或者肚餓咁扭計，見到BB著住長袖嘅棉衫同長厚棉褲，可以想像到兩個小朋友有幾辛苦，但女士自己反而係著無袖短裙

如果個女士只係保姆姨姨或者長輩，我希望家長可以留意下，因為小朋友中暑都可大可小。希望個女士唔係媽媽本人啦，如果唔係都想講返句生仔真係要考牌

讀者投稿@90後厚多士媽媽