#ParentLicenses1416

早幾日帶阿囡去商場，咁啱商場做梗推廣有遊戲玩，就同阿囡去排隊

遊戲入面有個媽媽帶幾個小朋友玩緊，而排我前面都有個爸爸帶佢個囡玩，但佢個囡就一枝箭跑咗入去，個阿爸冇阻止，只係企咗一邊

遊戲入面個媽媽就上前叫返個小朋友排隊。同時亦影響我個囡，我囡見人入，佢又想入， 不過就被我拉住。我細細聲我囡講：「想玩要排隊㗎，一齊等一陣啦」

之後，我聽到前面個爸爸細細聲又爆晒粗咁鬧，我當時就唔清楚佢鬧嘅對象係邊個，更以為佢只係鬧入面個女人，所以我就冇理會個爸爸

過咗陣，到前面爸爸個囡玩， 我就再同我個囡講：「下個到我哋㗎啦， 我哋再等多陣呀」

勢估唔到，前面個爸爸喺走嗰陣，特登走去我身後面爆粗鬧我， 內容大約話：「女人好煩」「未俾人鬧過」咁上下

我冇話返佢，只係覺得有啲父母好好笑，你自己唔教小朋友排隊係你嘅事，點解人哋教就話人？

最搞笑係，佢要鬧又唔會當面大大聲話你，竟然要走去你身邊細細聲鬧你，咁係咪佢都知成件事佢係理虧先唔敢大大聲鬧呢？

唉……我冇諗過喺香港教小朋友排隊都會俾人鬧

讀者投稿@無奈父母