#ParentLicenses2686

今日同小朋友喺啟德零售館對出嘅公園玩，突然聽到有個媽媽話：「好恐佈啊個小朋友！」

然後我望過去就見到個小朋友爬咗上去（如圖），現場都有好多家長都見到

我周圍望，望極都搵唔到保安，直至到我跑到去個公園外圍先搵到個有口音嘅保安。問咗兩個保安後，一個就話個公園唔係佢哋管，另外嗰個話佢啱啱返工俾人調過嚟，所以佢都唔清楚

好彩撞啱開幕禮附近有好多警察，我只好直接搵警察講。一俾張相個阿sir睇，阿sir已經話：「我叫咗佢返落嚟㗎啦！」

我：「吓？！我啱啱見到佢爬上去㗎啵！」

我猜測係個小朋友唔係第一次爬上去，應該之前已經有人通知過警察。之後阿sir搵到個小朋友再同佢講唔好爬，然後就走咗

呢個時候，我發現到個小朋友有好明顯嘅「蝴蝶手」，同時佢爬緊另一條滑梯。於是我只好搵返同一個阿sir，建議佢不如直接搵對方家長，因為個小朋友可能係SEN

最後阿sir點處理就唔知啦，因為我都趕時間要走

個公園唔係軟地墊啲嗰，去過嘅人就知現場有好多斜坡仔同碎石，如果真係跌落嚟，後果就不堪設想。由我發現個小朋友坐喺上面，再搵人嚟都有幾分鐘，佢家長竟然完全冇發現？假如個小朋友真係SEN就更加有問題，因為完全冇睇實佢！

而我更加唔明嘅係，平時一個普通公園都有保安駐守，點解呢個公園連一個負責睇場嘅保安都冇，然而公園外圍就有三四個保安「齋企」？真係離晒大譜

呢個項目投資咁多錢落去就係請埋呢啲廢人喺度，俾埋張相佢哋睇都淨係話：「五係禾負扎啊！」

相片來源@心血小的家長
讀者投稿@心血小的家長