![](https://i0.wp.com/backup.parentlicenses.hk/wp-content/uploads/2022/12/2014.png?resize=740%2C740&ssl=1)
#ParentLicenses2014
我一直以為自己同其他「被重男輕女」嘅女兒唔同,因為我喺好細個時已睇開咗,覺得即使係溝淡到1:99嘅愛都叫愛,不過原來只係我太高估自己
自我出世後有記憶開始,已經知道爸爸媽媽好錫哥哥。哥哥細個有哮喘,父母驚佢養唔大,花咗好多心機照顧佢。哥哥一歲時媽媽再懷孕,但因為照顧哥哥太辛苦所以小產,聽聞胎兒係個男孩子,父母好傷心
再一年後,媽媽再懷孕,有咗我
全世界都同我講我要感恩父母當年冇落咗我,好似話當年佢哋的確有擔心過大住個肚會照顧得哥哥唔好,曾經係唔打算生我出嚟,但媽媽最後唔捨得,所以我先有機會嚟到呢個世界
由細到大,我同哥哥因為性格同喜好都比較極端——佢鍾意喺屋企打機睇漫畫,我就鍾意通山跑識朋友,所以唔算好friend
喺屋企,我似家姐多過妹妹。父母成日話因為哥哥冇我咁好彩生得壯,所以我要錫哥哥,要幫佢,要就佢,我要乖,我要幫屋企做家務,自己照顧自己等等。我小學三年級已經識自己坐小巴返學、放學同去街市買餸
有時我見我哥成30幾歲人都冇乜自理能力,就連坐乜車出港島區都唔識,即使幫佢google埋,但最後都係要搭的士,我就好興幸自己唔係俾父母寵幸嗰個
幾年前,我結咗婚搬咗出去,翌年到哥哥結婚,佢同呀嫂搬咗出去租屋一年。後來佢哋話搞唔掂,爸爸媽媽就建議不如大裝修間舊屋,間一半出嚟俾哥哥一家,叫佢哋安心搬返嚟一齊住
同時期呀嫂有咗BB,係個男孩子,父母勁開心。呀嫂一早已諗住生完即刻辭職做全職媽媽,佢哋擔心哥哥負擔大,就直情叫佢連水電煤咩費都唔使交
其實喺嗰年,我都有咗BB,係個女孩子,父母話佢哋同樣咁開心。不過到我生咗後,有次我聽到佢哋同我老爺奶奶講:「唔好意思,今次幫唔到你哋添男丁」
前年,爸爸中風,再冇以往咁健步如飛。媽媽之後亦患癌,慶幸發現得早,肯做手術同化療,基本上7, 8成好得返
由於哥哥冇打針入唔到醫院,陪媽媽入院抗癌嘅責任就由我獨力承擔。媽媽經歷手術後,我基本上每星期至少兩日要去醫院,每次起碼大半日,感恩我公司肯體諒,批我請no pay陪診
直到前陣子,我發現我哥一家去咗迪士尼連酒店玩咗三日兩夜,我先知道原來佢一早打齊晒三針
既然打咗針,我建議大家輪流陪媽媽去醫院,佢話佢會同媽媽商量
點知嗰晚,我父母輪流打俾我,佢哋話哥哥公司嚟緊會有個升職機會,怕佢請咁多假會有影響
佢哋重話:「哥哥好辛苦,要養妻活兒,一個人擔起成頭家已經好大壓力」
佢哋覺得我有工人用,有老公養,返工都只是賺錢買花戴,唔似哥哥咁「男人做大事」,所以希望我可以體諒哥哥難處,唔好迫死佢
嗰刻,我崩潰咗
你哋叫我體諒哥哥,咁有冇人體諒我?我都一樣要返工,一樣係為人父母,難道全世界得呀哥有壓力,我冇?
我請一日no pay係呀哥日薪嘅三倍,佢冇咗份工,重有老豆老母養佢一家三口;我冇咗份工,邊個公一份婆一份供樓供書教學?我有工人姐姐唔代表我係少奶奶,我放咗工一樣要湊女陪佢做功課;呀哥有時間去迪士尼家庭日,咁我呢?我放假有時都重要陪父母睇醫生,處理娘家時不時爆水喉壞電器等嘅瑣事,難道我唔想多啲陪我個女去玩?
係咪因為呀哥生多我一條J,佢做嘅所有嘢就係「大事」,而我嘅所有付出就小到用顯微鏡都睇唔到?
媽媽聽完一直喊,佢話呢啲係做女兒嘅責任。我叫佢下次去醫院覆診時,自己睇清楚有幾多做兒子嘅都一樣會陪父母睇醫生,事實係多到你唔信,根本冇分男女
之後佢又話呀哥哮喘底,驚佢去醫院多菌會中新冠。喂,哈囉,其實呀哥好返廿幾三十年㗎啦。難道迪士尼唔多人唔多菌過醫院?呀哥通宵打機你唔驚佢猝死?反而驚佢中招咳兩聲會咳死?
最後爸爸又出絕招,不斷話當年如果唔係媽媽唔捨得落咗我,我一早投唔到胎做人,所以我應該要知恩圖報,一家人唔可以咁計較
哈,我以為我將我多年嘅抑壓表白晒,父母會心痛我呢個女兒,但原來我太天真
最後結論係,媽媽情願放棄治療都唔捨得叫哥哥請假
收線後,我忍唔住不停喊,然後我女兒走嚟同我講咗一句:「媽咪,婆婆唔錫你,我錫返你」
嗰刻我做咗一個我心裡面一直只敢諗但唔敢做嘅決定:移民!
我已經同父母講咗,我只能照顧到佢哋到今年六月。走前,我亦幫佢哋物色緊外傭幫手
爸爸問我可唔可以唔走,佢問我係咪嬲佢哋平安紙冇寫我名,又話已同哥哥講好咗,到佢哋百年歸老,哥哥應承會分一百萬俾我
我答佢:「其實喺媽媽病之前,我已知道你哋平安紙上面冇我名。如果我要嬲的話,我第一日就唔會請假照顧你哋。如果你哋心裡面真係有我呢個女兒,即使平安紙上寫留一百蚊俾我,我都已經好安慰,但你哋冇」
嚟緊外傭應該出年二月返工,interview時,我父母不斷叫我問佢識唔識照顧小朋友。其實我已預咗個姐姐嚟到後,應該服侍我哥一家三口多過兩位老人家,但我都唔理得咁多
最搞笑係,我嗰位平時「沉默是金」嘅哥哥前幾日突然蒲頭,佢要求我每個月負責返工人姐姐嘅人工,指責我唔可以咁不負責任就咁拍拍籮友移民走咗去咩都唔理
我:「CLS!」
然後cut鳩佢線
文章來源:讀者投稿@女