#ParentLicenses1761

之前睇呢度有個post講兩老知道投稿者對藥物敏感都照餵佢食藥，我有感而發，想講我個母親都係要考牌先好做母親

母親70幾歲，我同呀妹都係30出頭——無錯，佢係高齡產婦。由細到大，我同呀妹都好聽佢話，佢話一，我哋唔敢二，邊敢好似而家啲細佬駁嘴駁舌。只要一駁嘴，就會俾佢一巴車埋嚟，我仲好記得細個有次俾佢打完係頭痛咗兩日

喺屋企嘅時間佢係大晒，所以我好早就搬咗出去住，得返呀妹陪佢。呀妹成日投訴佢係「慈禧太后」，佢就嚟都頂唔順。我同呀妹期間識過男朋友，但全部都俾佢趕走晒，佢係癲到會打電話騷擾我哋嘅男朋友，叫佢哋唔好搞佢啲囡

重點嚟啦，因為我一個人住，所以領養咗隻狗，我返工嘅時候，就會放隻狗去娘親屋企叫佢哋睇住，夜晚放工再接佢返自己屋企。我妹係freelance攝影師，所以唔係成日有job，可以幫手睇住狗仔

我隻狗領養咗9個月都冇已經睇咗8次醫生，8次都係因為食咗啲唔知咩嘔同痾。頭幾次我哋以為係狗仔曳曳摷垃圾桶，我哋即刻圍晒廚房同買過晒有蓋嘅垃圾桶。之後發現原來係母親成日俾人食嘅嘢佢食，連朱古力都唔放過。我同呀妹有叫佢唔好再俾人食嘅嘢狗食，因為狗係唔食得，但佢每次都敷衍回應

我話：「我唔會再帶隻狗嚟！」

佢發脾氣話：「養你養咗咁多年，而家為隻狗反我？！」

我唔敢逆佢意，因為佢講得好大聲，我驚鄰居以為我哋虐老

本來由日日都帶狗仔去，變咗我放假先帶狗仔返呀媽屋企

琴日我放假，帶隻狗去呀媽屋企，跟住我落去買嘢俾呀媽食，返到嚟見到隻狗狂嘔黃色液體，我即刻問呀媽：「點解？」

佢話：「點知佢食咩垃圾」

我好嬲咁放低咗啲嘢食，再話以後唔嚟，佢將我買返嚟嘅嘢食扔向我同狗仔，入面係有湯麵，好彩我避到

我真係超嬲，我嘭門就走。呀妹做完嘢返嚟話啲湯麵喺地下冇執過，呀媽喺床度大喊

我已經被道德綁架咗成30年，其實呀媽當我哋係咩？囡定係工人？我真係想問下佢！

讀者投稿@做人父母要考牌