#ParentLicenses1532

真係真事

呀嗎係印尼人，呀爸係香港人——冇錯，我係mix

我呀媽好中意賭錢，我同細佬識行嗰時，就已經帶我哋去非法賭場度賭錢，一賭就賭一整日

我哋嗰時好細個唔識嘢，呀媽買包媽咪麵俾我哋，我哋就乖乖喺賭場坐成日陪佢。一賭到夜晚返屋企，就同我呀爸、呀嫲講帶咗我同細佬出街玩，但事實上佢係賭錢賭成日扮湊我哋

後來我呀爸知道事實之後好嬲，試過趕佢走幾次，扔晒佢啲嘢出垃圾房

我嫲同我爺就勸交，幫我媽執返啲嘢返屋企。跟住我媽冇賭一段時間後又再賭過，期間更識咗一個所謂繼父

冇錯，我呀媽喺我讀小學嘅時候已經俾綠帽我呀爸

我呀媽每年都會返印尼一次，但次次都唔俾我同細佬送機。但有一日，喺我中一嘅時候，佢執晒行李話返印尼探呀婆，今次好奇怪地死都要我同細佬去送佢機。走嗰時叫我要睇住細佬，生生性性

我嗰時冇諗咁多，以為呀媽最多返一個月就返嚟，點知過咗三個月都冇返嚟。我同呀爸期間一直問佢幾時返，佢就話呀婆有病要遲啲返。由三個月拖到半年，之後先同我講以後都唔會返！

雖然我嗰時已經中一，但我都好傷心，喊咗好多個星期，接受唔到呀媽用咁嘅形式拋低我哋

點知原來佢咁做都未算狠心，最狠心係佢留低一堆賭債俾我爸

因為佢地址係填我哋屋企，啲追數嘅成日上門拍門收數，淋紅油同搵膠水塞我哋鎖匙窿，搞到我哋成日出門都提心吊膽，好驚有收數嘅會捉走我哋。報警同裝閉路電視都做晒，但冇用的！還極都還唔清！

呀爸試過想跳海，因為當時呀爸收入都有困難，我都出嚟做兼職幫補屋企，而我真係好慶幸自己同細佬生性冇學壞

到而家我讀緊大學，我所謂呀媽竟搵返我。佢原來同個綠帽男已經有個幾歲嘅囡，成日都叫我寄錢返印尼俾佢養嗰個所謂嘅呀妹

我真係好嬲，雖然個生命係無辜，但點解要我一個仲要交緊大學學費嘅女去養你做錯事而生出嚟嘅生命？你嗰邊嘅老公呢？軟飯王？

我係絕對唔會幫佢養女，一係無能為力，二係我覺得我個所謂呀媽唔單止無當我係佢個女，更加無當我係一個人

真係唔知講咩好，所以唔係每個父母都錫自己仔女，家家有本難念的經，唔好係未了解人哋故事前，只憑三言兩語去評價人哋家庭事

圖片來源@LIHKG
讀者投稿@點解有啲呀媽咁狠心