#ParentLicenses2010

最近好多小學都申請回復全日上課，我教嗰間學校都唔例外，結果有好多家長媽媽聲話小朋友好辛苦啦！

如果問我本人，我就冇所謂，反正全日或半日都無咩分別，我日日喺學校都要做到六、七點先放工，啲會都係咁開……

咁有個家長上星期寫信去學校投訴，內容主要係話返全日「虐待」小朋友，卒之要出動校長去見佢

校長叫個家長解釋點解返全日會係「虐待」佢小朋友，而因為我係個小朋友嘅班主任，我當然都要一同落去啦！

好啦，聽個家長解釋，原來佢話佢幫個小朋友下晝報咗好多補習班，星期一中文、星期二英文、星期三數學……總之一至五都有

然後校長問佢：「小朋友除咗補習，重有咩課餘活動？」

家長就話：「冇，星期六日就學外文，唔打波唔跳舞唔畫畫」

家長講完之後，校長只係講咗一句：「咁阿家長似乎係你想個仔返全日學喎，日日放咗學重要補習，六點先離開補習社，重慘過下學期小朋友放三點半」

最後個家長駁唔到就狂道歉走人

兩年幾疫情令好多學校只返半日，從而令小朋友下晝多咗時間用。我明白家長原意係想仔女「贏在起跑線」，但咁密密麻麻安排小朋友放學補習，又真係對小朋友好？你覺得小朋友返學辛苦，唔通補習就唔辛苦？你唔想小朋友返全日，無非都係想佢哋有多啲時間休息，但你又幫佢安排咁多嘢，佢又有幾多時間休息？

圖片來源@蘋果日報
讀者投稿@GUEST