![](https://i0.wp.com/backup.parentlicenses.hk/wp-content/uploads/2022/11/2009.png?resize=740%2C740&ssl=1)
#ParentLicenses2009
最憎啲細路搶嘢、打尖!
據本人喺公園、playhouse打滾多年嘅經驗,大部分唔守規矩嘅細路都有一個共同點——監護人總係失蹤嘅
然而,本以為咁已經係罪大惡極,點知遇著個更加極品嘅,竟可以惡人先告狀!
話說早排同小朋友喺遊戲室碌緊一舊圓形物體,突然有個兩三歲嘅男仔衝嚟搶
本著有教無類嘅佛心,我堆起笑容好言相勸:「小朋友唔好意思,我哋玩緊。」
點知個男仔仍然繼續搶,我唯有嘗試將件嘢拎去另一邊唔俾佢掂,過程中佢家長完全失蹤
就喺佢想再搶而我拎起件嘢時,佢撲空大字形趴喺鋪滿軟墊嘅地下,然後跑去搶其他人嘢
呢個時候佢家長先姍姍來遲:「你可以唔俾佢,但你唔可以推佢!」
我解釋係佢小朋友自己搶唔到嘢跌親,點知佢竟然話:「你係大人,佢係小朋友,你見佢要撲嚟搶唔應該拎走件嘢」
Jesus!你不如話我應該拱手相讓?
實在聽過太多藉口,例如「佢重細所以唔識……」「佢係小朋友,所以你唔可以咁……」
明明就因為佢細,你先需要教;明明就因為佢係小朋友,先唔可以亦唔需要退讓
事件結束後,我同小朋友去一個有長滑梯嘅公園玩。結果又見一堆細路試圖插隊,情況惡劣到可以叫佢哋排隊唔聽,用手臂擋開唔理,捉住佢哋手臂都重想繼續打尖瀡滑梯。情急之下,我只好將佢扯開一旁,由佢喺地上打滾尖叫
Sorry,我真係唔會姑息養奸,奉勸所有放棄管教自己細路嘅家長,你唔教就人哋幫你教,到時唔好怨
讀者投稿@最憎人打尖