#ParentLicenses1814

我個囡今年6歲，喺九龍區某體操學校學藝術體操，報嘅係4-6歲嘅班，平時上堂要上1.5小時，著嘅衫係類似跳芭蕾著嘅連身裙

每次上堂前，我都會叫我個囡一定要去咗廁所先上堂，因為中心裡面冇洗手間，要去樓層嘅女廁，就算中心對正廁所，都要推過兩道相對重嘅門，仲要用鎖匙開兩把鎖後，先會入到洗手間（要用鎖匙開完第一道門，先會見到洗手間，再用第二條鎖匙去開洗手間嘅門）。故此，如果上堂上到一半，先話要去洗手間，仲要除嗰條連身裙，再先去到廁所，係會勁嘥時間同唔方便，一個4-5歲嘅小朋友亦都冇可能自己去到廁所

雖然每次都會叫我個囡先去廁所，但如果冇咩事，我都會喺中心等足佢1.5小時，最多玩下電話、睇下書打發時間。當然就唔係個個家長都會坐喺度等，大部分嘅家長同姐姐都係擺低咗個小朋友就會走咗去，夠鐘先返嚟

中心已經唔止一次用WhatsApp出通告同家長講：「要考慮返自己個小朋友嘅情況，如果佢唔能夠自己去廁所，請家長唔好離開中心，而中心亦好寬敞，有6-7個位俾家長坐喺度等」

但就係有一堆家長睬你都生芒果，你有你繼續WhatsApp出notice，我有我繼續me time

如是者，最近門口接待經常冇返，中心就得老師一個，而我亦成為唯一一個坐喺出面等嘅家長。有好多個星期，上堂上到一半，老師就開門叫幾個小朋友出嚟，然後「叫」我帶佢哋去廁所

咁當然，老師係好有禮貌咁問我可唔可以帶佢哋去廁所嘅，但事實係，唔通我say no？成間中心只得我同老師兩個大人，一係就老師擺低課室裡面嘅學生去廁所，一係就我帶囉😓

其實偶爾一兩次，我都覺得ok嘅，但已經好多個星期都係咁，而去廁所嘅來來去去都係嗰兩三個同學，仲要成班都話唔識去廁所

某同學叫我幫佢除衫，我真心覺得好唔恰當，始終點都會見到小朋友嘅身體，所以我最多教佢除，我唔會幫佢除，又要我記得用酒精幫佢抹乾淨個廁板先可以俾佢去

又試過有個小朋友同我講：「媽咪話toilet污糟呀，你抱起我痾呀」

更加有小朋友怨我唔肯幫佢，導致佢整濕咗件衫，要話俾佢媽咪聽。對於呢啲無理嘅要求同威脅，我一律唔會妥協，要同你媽咪投訴？Go ahead，我都想睇你媽咪會點講！

終於，今日俾我見到其中一個媽咪👩🏽‍🦰，我同佢講：「你囡囡未識去廁所，你可唔可以搵個人喺度等？已經好多堂都係咁」

👩🏽‍🦰黑晒面而咁答我：「唔會㗎喎，佢婆婆帶佢嚟嗰陣叫咗佢去廁所」

我：「但我已經連續幾星期帶佢去廁所，佢裙又唔識除，又唔肯用廁板」

👩🏽‍🦰：「佢邊有咁多尿呀，佢可能貪得意啫，你有冇真係見到佢痾？」

我：「咁我又真係無見到佢痾，不過既然你咁講，不如你同老師講下次唔准佢去廁所，如果萬一佢瀨濕地毯嘅話，你會負責返清潔費」

佢冇出聲，但我知道佢一定係咒罵緊我。而成段對話當中，佢連一句「唔該」，甚至一句「唔好意思」都冇

我明白坐喺度1.5小時係好燃燒青春，但個小朋友係你自己嘅，冇人有義務去幫你湊小朋友，包括老師、中心職員，同埋我呢個堂堂都坐喺出面嘅媽媽

你哋可以話我小器，咁小事都唔肯幫，但我真係唔覺得我有義務堂堂去做廁所長，唔通我唔想me time咩？我唔想去行下咩？但我會驚個囡上到一半要去廁所會煩到老師或者職員，所以我坐喺度等。如果你覺得坐喺度1.5小時好難捱，我建議你一係搵過第二班，一係搵間學費包埋托兒服務嘅中心

如果你賴係姐姐擺低個小朋友蛇咗出去，咁都係你問題，因為我問過中心職員，人哋話已經多次WhatsApp家長，所以結論一係你換姐姐，一係你自己搵屋低人帶，一係你唔好學啦！

讀者投稿@廁所帶位