#ParentLicenses1748

我之前喺一間好出名嘅日本動畫公司做兼職，即係有啲周邊商品賣嗰啲

我哋就有啲易碎品展示，啲易碎品價值大概係百幾二百蚊左右。我哋擺放嘅位置都貼晒提示「小心輕放，易碎物品」，著客人留意

因為呢間嘢都好受小朋友歡迎，有部分家長都好好，會叫小朋友眼看手勿動；但有啲家長呢，則會唔理又唔睇住小朋友

某日，有個大概6歲左右嘅小朋友睇完展品放返上去嗰時，展品放唔正，碌咗落嚟，爛咗少少

個老豆肯買返個樣嘢，但俾錢前講咗句：「你哋明知打得爛就放高啲啦，唔係放咁低俾小朋友拎到囉！」

我哋真係覺得好無奈。你唔理唔睇住小朋友，你有你睇，佢有佢睇，自己一啲責任都無嘅咩？乜都係人哋錯？

其實而家啲人唔教，將來受嘅都係小朋友自己，除非佢呢一世都唔使打工啦，如果唔係，當佢出到社會，係俾人鬧，而唔係俾人教

讀者投稿@搞唔掂