![](https://i0.wp.com/backup.parentlicenses.hk/wp-content/uploads/2022/05/1719.png?resize=740%2C740&ssl=1)
#ParentLicenses1719
真係真事,長文
本人課餘時間有做開私人補習,收費係每小時$130。最近就有新小朋友加入,係同一時間幫一個小六男仔同一個小一女仔補習,幫兩個鐘
家長係要求一星期補兩日,講明幫佢哋仔女完成功課,完成之後幫佢個女執書包,再有時間剩低先溫習
兩位小朋友係好乖、好聽話,叫佢哋做邊樣功課先,佢哋就做邊樣先。一般我會叫佢哋做咗英文、數學先,之後到常識、中文,最後做抄寫
然而,呀妹(小一)寫字係超慢,佢唔係偷懶,係真係寫字慢,佢已經好專心,好用力咁寫好每個字;而哥哥就比較聰明同快,所以我主要催呀妹寫快啲
點解我要催呀妹?係因為佢兩個鐘只係夠做晒啲功課,我係要額外留多15分鐘同佢執書包,佢呀媽仲會每次補完習後再夜晚8/9點打嚟質問:「點解幫唔到佢哋溫習?」
我同佢講:「係妹妹寫慢」
佢呀媽:「催佢寫快啲,考試寫咁慢點得」
所以我之後補習都會係咁催佢寫快啲,同佢講:「你媽想你溫習」
無奈係佢間學校超多功課,每次都有7至8樣功課,妹妹已經好俾心機寫,寫到咬嘴唇(真心)
喺呢兩個鐘裡面,我仲要睇埋哥哥,其實真係變相打仗咁。但佢哋兩個真係超乖,所以我繼續同佢哋補
不過就算幾乖,佢呀媽係永遠都唔滿意。寫得好快,完成晒功課同溫習咗,佢呀媽仲係會每次上完堂就打嚟,會話:「呀妹啲字唔夠靚,要注意」
其實妹妹已經承受好大壓力,一個小一生要兩個鐘內又要快,又要溫習,又要做晒功課,又要執埋書包,我都戥佢覺得可憐
問心我係做得多過個時薪,每次都會留多15至30分鐘(無補錢),幫佢哋執埋書包,溫埋習先走。但次次補完習都打嚟真係好煩,仲要有時唔係講補習嘢,係講佢家事
佢話佢老公喺大學做數學教授,數學超勁(佢真係咁講),但佢同佢仔數學超差bla bla bla
其實補習老師應該唔包聽家事啩,搞到我成日都要用啲藉口cut 佢線
而最大問題係有次我喺佢屋企補習,佢呀媽喺房教佢個仔,佢呀媽啲語氣係重到我以為佢喺入面打個仔。唔單止會超大力拍枱,拍到dum dum聲,仲話個仔:「教極都唔識,你點解唔死咗佢呀?如果我係你,我會跳樓囉」
鬧仔嘅聲浪係大聲到閂埋門我喺廳教呀妹都聽得好清楚。我細聲問呀妹:「冇事吖嘛?」
呀妹話:「我媽成日都係咁,唔使理」
最後我都係頂唔順,補咗一個月後同佢講唔補,跟住佢呀媽打嚟話:「咁無責任心補一半就唔補」
我真係忍唔住回咗佢:「你咁樣真係頂唔住呀,我已經次次超時補習同執書包,仲要聽你電話講家事,唔想再收130蚊一個鐘超低價做你出氣袋!」
讀者投稿@Tutor