#ParentLicenses1755

是咁的，我工作是教授小朋友毛筆書法，工作室地點附近只係普通屋苑。疫情舒緩一點，小朋友終於可以返學面授上課

有一日，一名自稱之前住高尚住宅，小朋友曾讀名校，但因為家庭問題，母子兩個被迫住喺佢聲稱嘅普通屋村嘅人嚟報名

當佢報名時，不停講自己而家無錢，又要出去搵工等等等等，但從對話之中又炫耀自己之前有幾有錢；又話以前學開嗰間好勁，而家附近冇，先迫住報我呢間普通嘢

我心諗：咁巴閉，返去以前嗰間囉🤷‍♀️

之後，我同個媽媽解釋課程時，佢個仔不停搞我課室內嘅嘢

我好客氣咁同小朋友講：「（笑住講）唔好亂摸呀」

佢呀媽即刻話：「係呀，唔好亂搞啦」

我嗰下以為佢都識得教下仔喎，😂哈，我誤會晒

個媽媽接住下一句講：「有菌呀，一陣整病你，人哋唔消毒，好污糟㗎」

我黑臉，門口明明貼咗定期消毒證明……但心諗：算，疫情關係，有學生報，我忍！

點知下一秒，個小朋友自己拎起我學生課程剛下堂，完成練習嘅宣紙，等吹乾中，墨水仲係濕濕

我即衝去個小朋友到，冷靜咁同佢講：「唔好搞喇，呢啲係其他小朋友作品，你整爛咗，咁其他小朋友會唔開心㗎」

個媽媽之後同小朋友講：「唔怕，你叻仔嚟！你學一堂都識，到時你寫返俾同學咪得囉」

我：「唔得㗎，作品要自己完成先開心㗎」

我一邊慢慢把小朋友作品移去另一張枱，然後將其他書法工具慢慢移到個小朋友掂唔到嘅地方，一邊講解課程

報名過程中個媽媽不停講自己個仔有幾叻、有幾乖、有幾厲害， 又話個仔怕生保、冇自信

但sorry，睇佢兩母子嘅行為，我完全睇唔出個仔有幾乖、怕生保同冇自信

終於報完名，搞掂可以送佢哋兩個出門口，點知個細路喺出門口前一刻，將我貼喺廚窗玻璃張海報嘅膠紙一嘢撕走咗，海報爛咗忽，之後掉埋落地

我不自覺咁「呀～」咗一聲，個媽媽轉頭望住我，再望下張海報，一嘢拖住個仔出門口，仲講咗句：「呀老師，你張嘢跌咗喎」

個媽媽仲一手拎佢個仔手上張膠紙，隨手扔咗喺地下

我超嬲！佢兩個走咗後，我即喺鋪內反鎖，驚佢兩個返轉頭！然後不停喺課室清潔消毒

可能我心理作用，唔鐘意佢哋，覺得唔清潔過晒佢哋掂過嘅嘢，我會好唔安樂！

其實我唔係話住高尚住宅嘅家長就會係無禮貌，只係我遇到呢個係咁啫

人哋尊唔尊重你，唔係睇你有無錢，而係你嘅行為值唔值得人哋去尊重你。你唔好同我講你以前點點點，其實我唔想知，唔係我唔同情你，而係你無尊重過我，你想我點同情你？！

讀者投稿@黑仔導師