#ParentLicenses2745

今朝返工，我喺調景嶺站上車去藍田。一上車我就企咗喺條柱左邊，前面有個女人抱住個幼稚園咁大嘅女。我左手一路俾啲嘢頂住個手袋，望一望，原來係後面個工人姐姐，佢一路望實個太太同個女笑，我見冇乜特別就冇理到

我一路都係望下前面、睇下電話咁。個細路就捉住條柱上上落落捽下，又指下上面個路線圖。個女人就行過去又行返轉頭，其實車廂又唔算好迫，但就係咁撞嚟撞去。心諗搭地鐵都好平常，工人姐姐文化唔同又唔係特登，個細路又細，算啦

去到油塘過藍田段車程，我眼角feel到個細路望實我（係盯住嗰隻）。細路仔呢個年紀對周圍好奇都好正常，我繼續望前面地下，冇望過佢。之後feel到個阿媽都望過嚟，咁我自然又望下佢啦。點知佢突然瞪大對眼睥住我，我重諗緊做咩事之際，佢就已經先聲奪人問：「咩事呀？」我話：「冇事呀，你望住我我先望下你之嘛」佢冇出聲，我都冇再望

事隔幾秒，我聽到佢同個女講：「我驚你整到人呀嘛」我保持把聲平靜，同佢講：「佢（個細路）冇整到我呀，係你望住我我先望下你咋，佢冇整到我呀」我專登講兩次「佢冇整到我」。個女人冇理我，個樣重要好衰格咁藐咗我一眼，跟住藍田站落車

如果位阿太你睇到呢篇文，我真係想講：當時唔係見你抱住個女，我一早出咗聲。你做咗人阿媽，出到公眾場所，你望得人，人哋都可以望你，我以為係常識囉。你個女望實我先㗎，唔通我又好似你咁，睥返佢然後問「咩事呀」咁？

係咪就係因為你呢種人，搞到好多人鬧生過仔嘅媽咪特別惡、特別癲？唔好賴咩生完受荷爾蒙影響、湊仔辛苦，大把媽咪都好正常㗎。我聽到你賴落個細路度，話「驚你整到人」，搞到好似我好厭童咁。你抱住個細路實著數啦，有咩事就屈人針對小朋友，一嚟驚嚇親個細路，二嚟我都戥個女可憐，我先費事同你講咁多

另外，你咁驚撞到人？由頭到尾撞親人都係你同個工人姐姐，個細路根本冇掂到我，而且成件事根本唔係關於撞唔撞，而係你個眼神、把語氣同態度太奇怪，直頭似無啦啦想搵交嗌

難怪成日有人話「生仔要考牌」，點解隨隨便便咩人都可以生？生完唔係害咗個細路，就係教壞佢，真係陰功

讀者投稿@ Lok Sum