#ParentLicenses2837

小朋友一歲，一家三口一齊住，我有返兼職一星期一兩日，嗰一兩日就先生湊，所以平時唔返工嘅日子係自己湊返

有一排因為湊小朋友嘅問題搞到好攰、好大壓力、好唔開心，所以有日放假俾咗我媽咪湊幾個鐘，我自己去行街散心

行行下，咁啱遇到路過嘅姑奶。初頭佢都係只係問：「今日係咪放假？」「小朋友呢？」

我話：「小朋友去咗婆婆屋企玩，轉頭接」

點知佢一輪咀係咁話我「行街唔帶埋個仔」「自己一個自私行」「做咗阿媽冇責任心」

本來同佢都有啲不和，唔想理佢繼續自己行，佢就一路大大聲話我，方死路人唔知咁，然後嗰下我忍唔住爆佢一鑊

直到當晚家庭whatsapp group係咁響，就係俾姑奶當眾公審兼加鹽加醋，又話我喺街當眾鬧佢，指責我冇大冇細，又話要擺我上facebook嘅生仔要考牌教育下我。群內全程得我先生教訓佢，老爺奶奶都冇幫過我

先唔講姑奶把口有幾賤，我想問做咗父母係咪要理所當然地犧牲奉獻自己一生？係咪連一丁點休息嘅空間都唔可以有？我又唔係所有放假日子都拎小朋友俾人湊，幾個月都係得一日，一日有幾個鐘係俾婆婆湊一陣，係咪連呢啲休息時間都唔可以存在？就算我完全唔湊掟俾人都唔關佢事啦？

最後要多謝我嘅隊友，但唔想每次都搵佢做擋箭牌，但唔搵佢幫口我又係繼續被男家親戚恰

讀者投稿@心很累的媽媽