#ParentLicenses2742

今日食完晏，大仔同細仔想去公園玩，我就叫工人姐姐先帶佢哋過去。我俾埋錢後，大概,三分鐘後就行到公園

我大仔見到我就過嚟同我講，話頭先有個小朋友突然喺佢面前出現，所以佢撞到個小朋友。我行去睇吓個小朋友，小朋友喊緊

小朋友嘅阿媽就話：「你仔跑得好快撞到我個仔，我個仔喊得好犀利呀」
我：「唔好意思，不過小朋友喺公園跑，唔係特登撞人」

然後佢仍繼續鬧，但係都係重重複複講「你個仔跑得好快」「我個仔喊唔停」之類。我問佢「咁我有乜嘢幫到你」，佢又答我唔到，跟住我就去返陪細仔，但仍然留喺公園範圍

過咗幾分鐘後，佢行埋嚟同我講，話佢個仔平時痛都好少喊得咁犀利，而佢個仔係唔識表達自己嘅，所以好擔心佢腦震盪

我問：「你小朋友幾多歲？」
佢：「四歲」

我再問：「你個仔係咪唔識講嘢？」
佢：「係」

我估佢小朋友係有特殊需要，所以我平心靜氣咁同佢講：「小朋友撞到，我哋應該觀察吓佢有冇嘔或者有冇口鼻出血嘅反應，大概要觀察一個鐘，如果你而家冇任何表徵，去到醫院醫生都唔會即刻幫你照腦」

佢又好似明啲唔明啲咁，咁我就繼續留喺公園同個細仔玩，不過離遠觀察住佢哋

再過多幾分鐘，我見到佢個仔已經坐低玩緊電話，冇再喊。未幾，我哋就離開公園，去咗附近商場嘅一間舖頭

隔一陣，個媽媽就嚟咗舖頭，同我講話要帶個仔去睇醫生，叫我留低電話俾佢。我話我係一定唔會俾電話佢，佢就話報警，我話冇問題，我留喺度唔會走，但係我亦唔會俾電話佢

跟住佢又鬧一大輪，話你個仔撞到我個仔、睇醫生要負責諸如此類，然後佢離開咗舖頭。我繼續喺舖頭逗留多十幾分鐘，佢亦都冇再出現，亦都唔見有警察嚟，咁我就走咗

我之後問返工人姐姐，佢一直都睇到成件事。佢話係個小朋友自己攞住電話、睇緊電話、喺公園度行嚟行去，然後突然之間打橫喺我大仔面前出現，我大仔根本睇唔到，亦冇可能避到佢，於是就撞跌咗佢，但係佢係跌落公園嘅軟墊上面，當時小朋友阿媽係喺十幾步以外嘅範圍

我奉勸呢位媽咪，如果小朋友咁細個，而且有特殊需要，千祈唔好再俾佢自己玩電話，更加唔好由得佢喺公園範圍內望住電話散步，就算唔係有人撞到佢，佢都會自己撞埋條柱度，係好危險㗎

我之後再問大仔件事嘅細節，佢話小朋友一跌，佢阿媽就攞咗佢部電話，而小朋友一路喊，亦一路重想攞返部電話

其實我大仔去公園玩有時好蝕底，有踫撞一定係大仔錯咁

讀者投稿@大仔阿媽