#ParentLicenses1534

小女今年剛升讀小一，千辛萬苦叩門入到屯門黃金附近一間慈善機構個名好長嘅津小，課程唔催谷，正常應該好開心……

每次接放學同囡囡邊行邊傾，佢都會講吓班中情況。基本上一星期有四日都會講某個男同學點曳，但我冇特別理會，以為對方只係比較活躍嘅男孩子一名

越返學就好似越唔對路，點知上星期，有個家長突然喺個非正式嘅班谷問：「有冇小朋友知道當日上體育堂發生咩事？」

該家長聲稱自己仔仔被另一同學按在地下受傷。我一見到「受傷」嘅字眼，當然即時問自己囡囡，原來係真有其事，難以想像欺凌事件喺小一就出現！

第二日接放學時，我再同其他同班家長了解，先知道按人在地下那男同學，就係平時囡囡講好曳嗰位，屬SEN學生

除咗今次呢次事件外，原來佢一向都有從後推同學嘅行為發生，亦有從後攬女同學、扯校服等等傷害他人嘅行為

我及後再向嗰位家長查問，原來佢仔仔已經受過推撞4, 5次，傳聞早排已經向校方反映過

其實，我對於融合教育政策無異議，應該話冇本事讀直私就冇得異議。如果只係學習進度有差異，其實問題真係唔大，可能喺大家做卷有唔同，或者有老師補底

然而，我現時所擔心，係嗰名SEN同學似乎經常有無差異兼無定向嘅欺凌同傷人行為

雖然問過自己囡囡，只係試過有輕微推撞同扯佢學生證，未至於達到傳說中嘅攬或推撞

而家先開學兩個月，我嘅擔心幾時先捱到學期完，仲未知明年係咪同一班😥

融合教育係咪要一般同學接受埋呢啲欺凌底者傷害性行為，還要變得合理化？點解人哋嘅家長唔俾小朋友讀啲合適嘅學校？搞到喺學校完全冇朋友，個個都怕咗佢，咁樣又對小朋友成長好咩？

圖片來源@龍珠
讀者投稿@小一女生家長