#ParentLicenses1507

我有個親戚，佢個女3歲，有時佢阿媽唔得閒，會嚟我屋企，我媽代湊，大概一個月有幾日

個女3歲幾都未識講嘢，終於去做檢查，確認係有speech delay，唔知係咩原因導致，可能先天，亦可能係後天

我哋之前就以為個細路大咗就會識講嘢，但見佢一路都冇進步，而家就只好去搵therapist處理

親戚兩夫婦好鍾意同個女講英文，但好港式，而且完全唔係完整句子，意思好簡單嘅英文例如：「Nono呀吓」「cannot shout」「eat the fish」呢啲等等

我喺過時過節先見到人哋父母，已經聽得出父母自己英文都未搞掂，個女聽來聽去都係嗰幾句，點學講嘢呢？而我哋一個月先會見個細路幾次，又幫唔到幾多

有時見個細路聽唔明或者似想講嘢，但又唔識表達，我覺得好慘，小朋友都會覺得唔開心

最近中秋過節時見到人哋父母，我鼓起勇氣，好多事咁提議：「不如試下講返中文啦，小朋友會自動學識，之後再學返英文，起碼佢識講啲嘢，融入吓周圍嘅大人先」

其實我更加想直接講：「你哋無能力教個女英文，不如踏實啲講返中文啦」

當然，最後都係以後輩身分有禮貌地提議而已

不出所料，都意料到人哋覺得我太多事，但大家都好客氣

親戚：「係想同佢預備之後面試返學，識英文好過中文，嚟緊會有工人姐姐嚟同佢講英文，個小朋友會越來越叻㗎喇」

我內心即時好崩潰，竟然係旨意嚟緊嘅工人姐姐？！又唔知個姐姐英文咩程度，父母自己英文唔好，又咁抗拒同個女講返中文，我係外人都覺得小朋友錯過緊童言童語嘅階段

我好戥小朋友慘，如果有工人姐姐嚟咗，個細路就應該唔使再過嚟，到時佢係咩情況我就唔會見到喇

講到底，我始終係外人，既然人哋父母都安排咗，祝佢哋好運，同埋我第時應該唔會生，做父母真係太大責任

讀者投稿@Jovy