![](https://i0.wp.com/backup.parentlicenses.hk/wp-content/uploads/2024/03/2504.png?resize=740%2C740&ssl=1)
#ParentLicenses2504
承上兩集 #ParentLicenses2098 及 #ParentLicenses2276 嘅故事之後,屋企又迎來一大轉機。今次故事會有啲長,但希望能帶俾家中有SEN小朋友嘅家長一點正能量
話說距離和接管我姨甥已經八個月,容我先講下佢有咩問題。佢本身有嚴重嘅ADHD,屬自閉症普系患者,讀默寫能力缺損(即讀寫障礙),但智力達一百二十幾,全身性濕疹
佢喺未跟我之前,冇紀律、偷懶、講大話、偷糖食、扭計、發脾氣、每日被老師投訴、出位、整傷同學等等時有發生,而學業方面,默書得二三十分,考試最多都係六十幾分,好多時都只係三四十分
現在佢剛過八歲,完全可以控制自己用手機時間、可以自己較鬧鐘起身、著衫執書包、自己食早餐、執床、摺好已洗衣物、幫手開飯、抹枱、產貓砂、洗下杯。理財方面,佢已學會儲錢、捐錢、用錢,有少少投資概念。學業方面都有長進,中英默書得一次係七字,其他八九字頭,而剛過去嘅考試,除咗中文差兩分合格,其他全部有七八字頭!
我真係唔係想曬命,我係經歷過痛苦、失望、絕望、崩潰,我好希望話俾正在經歷嘅家長知道,大家嘅小朋友絕對係可以變好,只要肯去堅持!
以下,我會講一啲我哋生活中嘅例子,希望能夠幫到各位家長
第一、ADHD小童一定要搵醫生同藥物幫忙,最好係搵私家嘅專科。黃金改變期就係五至八歲,冇幾多日子容許公立醫院慢慢嚟。而家發展出好多新藥,副作用都好少,比較容易克服。最初睇症係貴啲,平均一個月要三千五左右,但試好藥,返去公立醫院叫醫生開返一樣嘅藥,就可以輕鬆好多
如果冇藥物幫助,你講一百句,小朋友先聽到一句,因為佢控制唔到自己。不過又唔代表食咗藥就會有三百六十度轉變。藥物只係幫小朋友打開耳仔,你會趁有藥效時,幫佢學習控制自己!
家長亦可以報啲言語治療班、社交小組堂、籃球班,俾佢學下規矩!
第二、最好唔好俾小朋友食太多糖,特別ADHD同濕疹患者,建議可以改食用天然糖做嘅糖,喺大型網店搵無糖糖果,當中有大把選擇,味道同平時嘅糖差不多的,但唔會令小朋友失控
第三、家長們一定要絕對嘅規律生活,先可以俾小朋友去學識咩叫紀律。自己講過乜嘢,一定要算數;如果你都唔守規矩,唔好指意你嘅小朋友都會守規矩
例子一:我話咗去公園三十分鐘,就算去到十分鐘時,我已經比蚊針咗十幾撻,我都會試下堅持,實在唔得時,就同小朋友商量(先講狀況,再徵求佢同意),唔得就要守諾言
例子二:制定好時間表,每日跟住做。我哋寫咗個表,小朋友例牌早上七點零五分起身,起身後佢會做晒表上嘅嘢,換衫刷牙咁,俾我檢查校服,七點四十五分就出門。日日如是,紀律生活
第四、做好情緒管理。無論小朋友定係家長,有情緒係處理唔到任何事,大部分家長,遇到小朋友一扭就冇辦法唔妥協!有啲人就會話:由佢扭,扭扭下就停,但真係有啲個案係可以喊n小時!我研究過,幾乎所有咁嘅個案,小朋友唔係喺度發洩情緒,而係同父母「開緊戰」
其實我哋喺呢個階段,唔係要由得佢喊,而係需要適當引導
例子:小朋友扭計時,我會明確表明:「你想喊就喊咗先,冷靜後,我地再傾!」
喺呢個時候,我會攬住佢,或者俾佢自己喺房(同佢冇視線接觸,佢見你唔到)。隔五分鐘後,我會問佢好啲未,想唔想開始解決問題?得定唔得都好,我會叫佢洗個面,飲啖水,深呼吸先!之後,就可以去引導小朋友思考,你頭先係咪唔開心啊?除咗唔開心,重有咩情緒?點解你會有呢啲情緒?而家講咗係咪舒服啲?等等嘅問題
跟住先係重點。我同佢分析返件事(例如小朋友想食糖,家長唔俾),先分享返食糖嘅壞處,蛀牙、糖尿等,建議上網搵圖片加強說服力,之後引導返小朋友去理解:爛牙得人驚嗎?好痛㗎蛀牙,咁你想唔想好似圖中咁爛牙?變成糖尿腳,要切腳仔,你可唔可以幻想得一隻腳,你點算好?
然後再嚟就係俾小朋友自己做選擇:我俾你自己選擇,呢粒糖你都係想而家即刻食,定係留返我哋聽日再食?
記得任何選擇都要尊重,更加唔好嫌煩,嫌辛苦,嫌小朋友唔明,頭幾個月辛苦,之後佢可以自己做啱嘅選擇,你會感激當初嘅辛苦
做法因人而異,雖然又煩又辛苦,亦唔係速效,但長遠計,小朋友獲益會更加多。其實,重有好多嘢可以幫到小朋友,不過唔想太長,下次再分享
共勉之
讀者投稿@大大大大姨媽