#ParentLicenses2812

細個嗰時屋企人好重視讀書成績，中小學一有考試測驗嗰啲就好緊張

記得嗰時喺小學，嗰排無咩考試測驗默書，大家週末夜晚就喺度睇電視。猶記得當時英文台係睇緊以前啲電影定動物片嗰啲咁上下，惟去到廣告時間就出事了

佢有嗰啲現在報時幾多點，睇緊英文台就梗係講緊英文報時，無啦啦被老豆突擊測驗，問我幾點幾點個英文係點講。其實我嗰時只係識好少，我當時大約係二三年級咁上下，嗰時老師係有教過某啲時間英文係點講點讀，但只係教咗搭正（at 9 o clock）同搭半（half past 3），其他係無

嗰時個報時係9點03分嗰啲咁，咩3 past 9咁上下，但當時嘅我真係唔識，老師都無教，咁咪直話唔識

然後我老豆就扯火了，佢係咁話我「明明識，但話唔識，重要講大話扭老師無教，係你自己屎，無俾心機讀書都重要講大話！」

而家諗返轉頭，老豆有同我温書，佢記得我有學咗搭正搭半啲基本嘢後，就以為我識晒，以為老師教晒

講咗好多次唔識
唔信，開始鬧
再問，再講多次唔識
唔信，開始打我
再問，我都唔敢講嘢，只係搖頭
就老扭我搖頭係認自己唔記得，唔係唔識
然後就開始話要掉我啲玩具，叫我自己掉，又嫌我執得慢，就叫我唔使執，馬上即刻叫我入房去瞓覺
喺房入面一路聽到佢喺廳好大力咁扔我啲玩具落垃圾袋

呀媽有入過房嚟問我係咪真係唔識，係咪真係老師無教，我話係真，老師真係無教，我真係未學過

第二朝起身，啲玩具無晒了

過咗三兩年升到上五六年級，打開本書教睇時間，就係教3:04應該係點表達。當時個感受真係好大，真係證明咗我係未學，我係被老屈學咗，被老屈我講大話，我老豆係喺我二三年級時問我五六年級嘅嘢，而且扭我唔識係我有問題

直到而家大個咗，打工都打咗十幾年。我有一間房係成間房都係玩具嚟，主要都係高達模型。面嗰浸，我覺得玩高達模型真係開心，始終玩咗好一段時間，出嚟打工又有錢買工具，叫做有啲技術咁都有啲滿足感

但有時夜晚靜靜地，我覺得底嗰浸，係因為細個嘅時候有呢啲經歷，被人扔玩具都唔只一次，同埋成日被屋企人困喺屋企讀書，就偷偷地喺書枱下砌模型。而家大個咗，就會想買返呢啲玩具嚟玩，其實都修補唔返以前嘅經歷，以前嘅傷害，但至少而家自己可以有能力買，有能力擁有，又唔使成日驚自己擁有嘅嘢會突然被人奪去，更要命令你自己親手扔咗佢，真係好痴線

讀者投稿@豬牛羊