#ParentLicenses1492

今日送完個女上興趣班，就去咗貢茶買杯茶，搵個位坐，順便做下嘢

過咗冇耐，有兩個媽媽（仔女係小學了）過嚟搭枱

喺同坐嘅呢段時間，聽到佢哋啲對話內容，真係心中無限個白眼

一開始喺度講話好唔鐘意啲屋村媽媽（😅唔好意思，你對面嗰個就係個屋村媽媽），認為出身屋村啲媽媽真係同佢哋哩啲住屋苑嘅唔同

其實佢應該係附近居民，因為大家同身處喺細商場。哩邊嘅樓價都只不過係幾百萬，都未過千萬，相信佢都只係住屋苑，而未到住獨立屋啫

屋苑媽媽：「屋村出身就係屋村出身，唔識教仔女，又唔識幫仔女報興趣班，唔似我哋咁，以前細細個咁已經報班」

更有話屋村媽媽嘅思想亦不及佢哋屋苑媽媽，仲提及幾個仔女同班的同學邊個邊個住屋村，再話人哋父母做地盤、做麻雀館，又點點點咁

除此之外，佢哋不斷批評人哋嘅子女。話一個小男學生（有提及名字）成日都笑，咩都笑，不易聽指令，書包都孭得唔好，唔知仲以為個小朋友有問題

又話另一個女同學個性太……爽朗，話好聽啲係「爽朗」，難聽啲就係「男仔頭」。可笑係佢雙重標準，可以讚人哋個女爽朗，但如果係自己個女被讚，佢又接受唔到，覺得女仔就應該似返個女仔

其實仲有講咗好多，不能詳錄

聽到佢哋哩大段對話後，完全地顯示咗自己無內涵、眼光短淺。果然，無論出生屋村又好，屋苑又好，豪宅又好，人嘅眼光同思想果然唔一定成正比

其實子女識唔識教係睇父母身教、言教，唔係睇你邊度出身。有能力俾子女報多興趣班，只係顯示你財力，唔代表個人內涵有修養，而且長大後都唔一定比少報班嘅子女成功同優勝

最不屑係仲要係咁批評人哋嘅小朋友，我真係火，即使小朋友喺細個嗰陣性格比較特別，都好過只做一個活著嘅「機械人」

「尊重他人」果真唔係個個都識，出身好啲啲，但仍然做井底之蛙

當然，呢類有咁嘅思想嘅人，同佢講都應該唔明白，所以我速速彈走，唔想同枱「升高」我身份，我只係樂做一個「屋村媽媽」

圖片來源@長江七號
讀者投稿@屋村媽媽