#ParentLicenses2748

作為一個老豆，我平時成日都教我小朋友要有禮儀，要企喺人哋角度諗，唔好做啲會影響人哋嘅行為

我到而家都唔明啲做人父母嘅，點解你可以由得你小朋友尖叫，不停亂咁跑亂咁跳。小朋友有活力係正常，但係應該要睇場合，當尖叫影響到人嘅時候你應該制止。但我見過無數無數咁多次，家長都只係望住個電話，同個小朋友講「喂，No，Stop」，然後繼續望住個電話。根本就冇控制過個小朋友，我唔知你生佢出嚟做乜嘢

話說我返工做嘢做到好攰好燥，返到屋企樓下搭𨋢時，已經有個阿媽、一個工人，同一個大約兩三歲、有基本講嘢能力嘅小朋友喺度等𨋢。兩個成人都只望住個電話，完全冇理過我小朋友喺度走嚟走去、大聲尖叫。隨後，個阿媽淨係講咗一句「喂」就繼續望電話。嗰吓我已經覺得好討厭，因為本人對聲音係極為敏感

直至部𨋢嚟到，我哋一齊入𨋢。一入𨋢關門姐姐就撳咗樓層，而跟隨其後嘅小朋友一入𨋢開始嘈要撳𨋢喺度叫，姐姐唯有抱起佢俾佢撳。之後小朋友開始不停喺部𨋢度跳、尖叫，佢阿媽仍然係一句「喂」就冇然後

嗰下，我唔知哪來嘅勇氣，可能我嗰日工作上真係太攰太燥，我決定喺部𨋢度咆哮。我大力喺部𨋢度跳，然後咆哮式同個阿媽講：「嚟吖！一齊唔好返屋企，我就跳停部𨋢等消防嚟救。我唔趕時間，你唔識教細路你嘅事，但你而家影響到我，咁一齊困𨋢等人救吖，我都係我老母個仔之嘛」

嚇到個小朋友呆咗開始喊，兩個大人都呆晒。個阿媽應該覺得我係癲嘅，不停同我講「對唔住，唔好意思」，個小朋友喺度喊都揞住佢把口，好快我就到咗行出𨋢，而佢哋繼續上，關門我仍然有以一個目露凶光嘅眼神望住佢哋

我都想喺度同個小朋友講對唔住，嚇親你，希望經過今次之後你會記得。我想講，你有個咁嘅阿媽係你嘅不幸，佢唔識教你，個社會就會教你。今日你好彩遇着嘅係我，他朝有一日你真係遇着個真癲嘅，後果係點真係無人知

讀者投稿@人地既燥底老豆