#ParentLicenses2587

今日喺第一城嘅康文署兒童遊戲室遇到兩件極品阿媽

咁啱坐佢哋隔離，唔知佢哋係有兩個定四個女，一開始就喺個場內瘋狂追逐兼大聲尖叫。突然間，有個女嘅就撞埋嚟我度，更直接坐住咗我，佢當然一句sorry都無啦，我都廢事出聲坐去另一邊

其後，呢四個女就不停追逐同埋一齊大聲尖叫，仲要邊尖叫邊跑過嚟兩位阿媽度。多次大聲喺我耳仔大叫，我真係忍唔住講咗句：「可唔可以唔好大叫？」

兩位極品自私阿媽當然即刻話：「呢度係公眾場合，佢哋鐘意幾大聲叫都得，你頂唔順就自己出去啦」

嘩，自私到呢

其實呢個場就好應聲，有幾次都聽過其他媽咪講話啲小朋友嗌到咁大聲真係嘈。佢哋啲女係咁追逐都已經唔啱㗎啦，重要大叫發出刺耳嘅聲音，但當然呢度啲職員都係唔理小朋友點樣瘋狂追逐，長時間都只企喺出面

隨後有個職員嚟調停，佢話：「公眾場合啲小朋友嗌到咁大聲係好正常」

嘩，呢度好似貼晒標誌不可追逐㗎喎，點解佢哋尖叫到咁刺耳咪因為喺度互相追逐囉，點解啲職員可以合理化成件事？同時，我又唔明點解職員可以喺個場出邊企嘅呢，應該入嚟聽啲小朋友大聲尖叫，感受下有幾嘈啦！

讀者投稿@Lily