![](https://i0.wp.com/backup.parentlicenses.hk/wp-content/uploads/2024/04/2527.png?resize=740%2C740&ssl=1)
#ParentLicenses2527
你想你女快啲玩到,我明,但你哋咁樣行法,快啲入醫院就差唔多
現場係一個新型遊樂場,唔同型態的遊樂設施的確係令人賞心悅目又好有趣,惟可惜該場地唔係提示不足,就係在場者危機意識不足
當時有一對父女喺由另一邊(紅線所示),穿過中間去到箭嘴所示嘅位置。由於我站在左側推個女,背對佢哋前進嘅方向,所以根本見唔到有兩父女飆出來。雖然我即刻見到唔對路,但係我女對腳已經整到小朋友個背脊
見小朋友冇乜反應,我估可能只係掂到一下,但已經足夠嚇到我死!如果踢中佢塊面點算?因為太驚嚇,我連續講咗兩句「好危險,真係好驚」
我見唔到係個爸爸領頭帶住個女行過去,抑或係個女已經衝出阿爸先跟,但不論如何,都應該好好同個女講清楚,下次要點樣行,例如教佢在外圍行而不是穿過中間。然而,我只係聽到個爸爸同佢女講「小心啲啦」一句而已,然後就如常地玩
我相信如果我個女擊中咗佢女塊面,事情發展完全唔同。
其實呢種新型設施,真係要界定清楚條警示線,而個韆鞦係可以揈到好後㗎,玩到癲嘅細路點會去理遊樂設施美感與否。圖中呢個場嘅設施已算係分散咗無咁危險,但啟德、新蒲崗嗰兩個場簡直不能放心俾小朋友在中間跑,唔知設計者有冇落場睇返佢哋到底整咗啲乜呢?
你話我多事都好,勸告各位入呢啲遊樂場時,家長一係跟實小朋友,一係確保佢明白要點避開危險位,否則受傷或者令人受傷都唔好啦
圖片來源@受驚的媽媽
讀者投稿@受驚的媽媽