#ParentLicenses2378

想分享下我媽嗰邊嘅大家庭故事，內容係關於吸毒、育兒同重男輕女。篇幅可能會比較長，而且有啲亂，希望大家唔好介意

以我為第一身，我媽屋企有大姨媽、大舅父、二舅父、細舅父、細姨媽同埋我媽

先講吸毒——我嘅細舅父同二舅父都係癮君子（兩個都重吸緊）

細舅父同細舅母喺戒毒所認識，好快就拍拖。之後佢哋生咗表妹出嚟無幾耐，細舅父唔知係坐監定俾人塔咗去邊度，一年後就輪到細舅母唔知衰偷嘢定吸毒俾人塔埋

我屋企本相簿只有表妹一歲時同我嘅合照，因為表妹最終係送咗去保良局。表妹嘅出生非常不幸，父母都係吸毒，經常出入監獄，或許去保良局可能對佢會更好，或者可能會有更好嘅家庭收養佢

可能你哋會問，既然我媽咁大家庭，點解冇一個肯收養佢？大姨媽癌症成日復發，大舅父同二舅父唔想收養，細姨媽後生嗰陣離家出走冇再聯絡，而我媽係單親，只養到我

直至細舅父舅母出返嚟後，邊會估到佢哋竟然會接返表妹走。當時表妹九歲，我都唔知點解俾佢兩個接得走表妹。而佢哋就話覺得好內疚，想負起做父母嘅責任去養返個女

再講育兒——我完全唔覺細舅父舅母有做父母嘅資格

細舅母成日帶表妹去超市藥房偷嘢，喺屋企佢兩條友繼續上電。佢哋有佢哋上電，表妹就自己有自己玩。不過好彩，而家表妹都冇吸埋一份，佢曾經親口同我媽講話好討厭父母吸毒，唔想身邊嘅同學知道

最後講重男輕女——大姨媽好錫啲細佬

大姨媽好鐘意整甜品，永遠只係整俾啲細佬。我媽成日陪佢覆診同飲茶，佢有困難時我媽俾咗啲錢佢用，相反嗰三個舅父理都冇理過佢。我媽以前成日同我講覺得好心淡

全家成員入面，只得我媽讀到書。我媽話，當年我婆婆覺得女人唔需要咁叻，所以啲姨媽全部只係小學畢業，而二舅同細舅日日吸毒唔使旨意佢哋會上進，佢想就將資源放落大舅父，但大舅父成績唔好只係讀到中三

就算係咁，婆婆仍舊冇諗住投放資源俾其他女。然而，我太婆係反對婆婆，就想將所有希望放喺我媽度，就演變成太婆資助我媽。結果我媽年年考第一，不過當年公公婆婆非但冇覺得開心，而且覺得我媽係阻頭阻勢

最後我媽會考失咗手，但喺嗰個年代嚟講，可以中學畢業都算係咁。我媽好上進，日頭返工，夜晚讀夜校，再返份通宵工，瞓幾個鐘第日又再返工，為咗想賺多啲錢去進修

又講返細舅父。未接表妹返嚟之前，細舅父舅母係同婆婆一齊住，嗰時婆婆身體好差已經寫定遺囑（遺囑寫明啲錢平分俾三兄弟，而女就一個都冇份分），再將層樓轉俾細舅父。舅父舅母竟然聯手踢婆婆出街，而且揼晒啲衫褲鞋襪日用品出街，而我媽接走佢，喺我哋屋企住咗幾日後，跟住又返去同舅父舅母度住

點解我媽成日話心淡，大姨媽同婆婆都係重男輕女，啲仔點衰都咁愛佢哋，反而我媽做過咁多嘢，都係得個吉

讀者投稿@表姐