#ParentLicenses2339

我讀中學已經係一個170磅肥妹仔，曾經放咗好多心機時間去減肥，都係反彈得好勁。當年有個男同學帶頭欺凌我，重送咗「肥婆妍」呢個花名俾我，幸好同班嘅女同學幫我，成個中學生涯未至於咁難捱

畢業後，我改埋電話號碼，剩係同女同學聯絡。另外我都遇到做開健身嘅教友，佢教我減肥，幾年後好成功地減到11x磅

十幾年後，其中一位同學話搞個中同飯聚，叫晒全班人一齊食飯。多年前嘅事我已經放下，所以我無拒絕出席

當日唔少同學帶埋另一半同仔女出席，而當年欺凌我嘅男同學帶咗兩個女出嚟

既然婚又結埋，女都生埋，正當你以為生咗女嘅佢已經唔再係以前嗰位剩係識恰人嘅賤人之際，一切都係我太天真

呢個男同學話：「呢個姨姨呀，佢以前好似Ursula（美人魚入面嘅角色）咁肥、咁醜樣㗎！唔知係咪肥到冇人要先減肥呢？敏敏晴晴，你哋大個唔好好似呢個姨姨咁食到咁肥呀，冇男仔追你㗎！」

然後兩個女哈哈大笑咁嗌我「Auntie Ursula」

本身真係放低咗，以為做咗人哋老豆性格會變，嗰時旁邊啲同學都叫佢收下把口

我嗰下真係好嬲火山爆發咁鬧佢：「你都做咗人哋爸爸，好心你就唔好咁樣喺兩個女面前取笑人，你諗下兩個女返到學校都咁樣取笑同學，好似你以前咁欺凌人，你個心會唔會舒服？啲人話『生仔要考牌』真係冇講錯！」

男同學好輕挑咁話：「欺咩凌啫？你唔玩得就係唔玩得啦，肥婆研！」

最後我拎袋執嘢，留低一句「你哋慢慢食」，然後離開餐廳

圖片來源@香港仔
讀者投稿@小妍